
فضلت واقفة مكاني مش قادرة أتحرك وعيني مثبتة على الملاية اللي جنب أحمد وحماتي
قربت بحذر ومديت إيدي وخدت الحاجة اللي كانت محشورة بين طيات الملاية ولما فتحتها حسيت إن نفسي اتسحب مني
كانت ورقة صغيرة متنية كذا مرة وعليها كلام مكتوب بخط إيد حماتي
فتحتها وبدأت أقرأ وأنا إيدي بتترعش
لو قدرت تخلي مراتك تنام بره الأوضة الليلة دي يبقى إحنا كده نجحنا في أول اختبار ولسه اللي جاي أهم
حسيت إن قلبي وقع في رجلي
اختبار إيه؟ ونجحنا في إيه؟ وليه حماتي بتخطط مع ابنها من ورايا في أول ليلة جواز؟
رفعت عيني وبصيت لأحمد اللي كان نايم على السرير وبعدين بصيت لحماتي اللي كانت مغمضة عينيها ووشها هادي بشكل مستفز
كنت هصرخ وأصحّيهم لكن فجأة لقيت تليفون أحمد بينور على الكومودينو
كان فيه رسالة جديدة
مديت إيدي وخدته من غير تفكير وفتحت الرسالة
كانت من رقم مسجل باسم ماما
والرسالة بتقول
خلي بالك متنساش إنك وعدتني إنك مش هتخليها تعرف حاجة عن الشقة والفلوس غير لما نمضي الورق
شقة إيه وفلوس إيه؟!
بدأت أحس إن الموضوع أكبر من مجرد تدخل حماتي في حياتنا
رجعت التليفون مكانه بسرعة وخرجت من الأوضة وأنا بحاول أسيطر على نفسي
نزلت المطبخ وعملت لنفسي كوباية شاي لكن إيدي كانت بتترعش لدرجة إني وقعت نص الكوباية على الأرض
بعد شوية سمعت صوت خطوات على السلم
كانت حماتي
نزلت وهي بتظبط طرحتها وبتبصلي بابتسامة باردة
صباح الخير يا عروسة
بصتلها وقلت
صباح النور يا طنط
قربت مني وسألتني
نمتي كويس على الكنبة؟
بصيت في عينيها وقلت
مش أوي بس الحمد لله
ضحكت وقالت
معلش يا حبيبتي أصل أحمد ابني متعلق بيا من وهو صغير ومش بيقدر يسيبني وأنا تعبانة
سكت شوية وبعدين قلتلها
هو طبيعي إنك تكتبي لابنك إن اللي حصل امبارح كان اختبار؟
الابتسامة اختفت من على وشها في ثانية
بصتلي بحدة وقالت
إنتي بتقولي إيه؟
طلعت الورقة من جيبي وحطيتها قدامها على الترابيزة
وشها اتغير تماما
حاولت تخطف الورقة من إيدي لكني سبقتها وسحبتها ناحيتي
قلت لها
أنا عايزة أفهم إيه اللي بيحصل في بيتي من أول ليلة جواز
ردت بعصبية
بيتك؟ إنتي لسه داخلة العيلة امبارح يا حبيبتي ومتعرفيش حاجة عننا
وقبل ما أرد سمعت صوت أحمد ورايا
إنتوا بتعملوا إيه؟
لفيت وبصيتله وقلت
اسأل مامتك هي اللي هتشرحلك
أحمد قرب وشاف الورقة في إيدي وفجأة وشه اصفر
قلتله وأنا بحاول أمنع دموعي تنزل
إيه حكاية الاختبار يا أحمد؟ وإيه حكاية الشقة والفلوس اللي مش عايزني أعرف عنهم حاجة؟
بص لأمه وبعدها بصلي وسكت
لكن حماتي دخلت بسرعة وقالت
مفيش حاجة يا بنتي دي ورقة قديمة وإنتي فهمتي الكلام غلط
ضحكت بسخرية وقلت
ورقة قديمة مكتوبة امبارح؟
أحمد مد إيده ناحيتي وقال
ممكن تهدي ونتكلم لوحدنا؟
قلتله
لأ أنا مش هتحرك من مكاني غير لما أعرف الحقيقة
وفجأة حماتي قالت جملة خلت أحمد يصرخ فيها لأول مرة في حياته
إنت كنت فاكر إني هفضل ساكتة لحد إمتى؟ لازم تعرف مراتك إن الجواز ده مكانش بالصدفة وإن الشقة اللي هي فاكرة إنها باسمها فيها حد تاني شريك معاها من زمان
بصيت لأحمد وأنا مش فاهمة حاجة
وسألته بصوت مبحوح
يعني إيه الشقة باسمي وفيها حد تاني شريك معايا؟
أحمد غمض عينيه وكأنه كان مستني اللحظة دي من زمان
وبعدين فتح عينيه وقال
فيه حاجة لازم تعرفيها عن جوازنا يا ندى بس أوعديني إنك مش هتسيبيني قبل ما أخلص كلامي
وقبل ما أقدر أرد رن جرس الباب
أحمد اتخض وبص لأمه
أما حماتي فوشها اتقلب وقالت بصوت واطي
يا نهار أسود ده جه بدري ليه؟
ولما أحمد فتح الباب ودخل الراجل اللي واقف بره شوفته أول مرة في حياتي لكن أول كلمة قالها كانت كفيلة إنها تقلب حياتي كلها
أنا جاي آخد حقي من العروسة الجديدة وعايزها تعرف إن جوزها مدين لي بمبلغ مليون ونص جنيه من قبل ما يتجوزها!
أول ما الراجل قال إنه عايز مليون ونص جنيه من جوزي حسيت إن رجلي مش شيلاني وبصيت لأحمد اللي كان واقف قدام الباب مش عارف ينطق بكلمة
الراجل دخل من غير ما يستأذن وحط شنطته على الترابيزة وقال
أنا اسمي عماد وكنت شريك أحمد في مشروع تجاري من سنتين ولما المشروع خسر أحمد خد فلوسي ووعدني يرجعها لكن لحد النهارده مفيش جنيه واحد رجعلي
بصيت لأحمد وقلت
إنت مديون لمين يا أحمد؟ وإيه علاقة الشقة اللي باسمـي بالموضوع ده؟
أحمد حاول يتكلم لكن عماد سبقه وقال
الشقة دي مش بتاعتك لوحدك يا عروسة لأن نص تمنها أنا اللي دفعته من فلوسي وأحمد سجلها باسمك عشان يضمن إن محدش يعرف إنه باع نصيبه ليا
اتسمرت مكاني وبصيت لأحمد وقلت
إنت جبتلي شقة على إنها هدية جوازنا وهي أصلا عليها ديون ومش بتاعتك؟
أحمد قرب مني وقال
اسمعيني يا ندى أنا كنت ناوي أقولك كل حاجة بس الظروف كانت صعبة وأنا كنت محتاج فرصة أبدأ من جديد
صرخت فيه وقلت
وفرصة البداية الجديدة دي هتكون على حسابي أنا؟ إنت اتجوزتني عشان تحط ديونك ومشاكلك في رقبتي؟
حماتي قامت من مكانها وقالت بعصبية
إنتي بتتكلمي عن ابني بالطريقة دي ليه؟ الراجل بيحاول يحافظ على بيته وإنتي بدل ما تقفي جنبه بتفضحيه قدام الناس
بصيتلها وقلت
هو ده بيته ولا بيتك يا طنط؟ لأن من أول ليلة جواز وأنا حاسة إني ضيفة عندكم
عماد ضحك بسخرية وقال
واضح إن العروسة لسه متعرفش أهم حاجة
بصيتله وقلت
إيه كمان؟
فتح شنطته وطلع ملف كبير وحطه قدامي
وقال
أنا مش جاي أطلب فلوسي وبس أنا جاي أقولك إن فيه ورقة متوقعة باسمك في الملف ده بتضمن حقي في الشقة
مسكت الملف بسرعة وفتحته وبدأت أقلب في الورق لحد ما لقيت عقد عليه اسمي ورقم بطاقتي وتوقيع شبه توقيعي
لكن المشكلة إني عمري ما مضيت على الورقة دي
رفعت عيني لأحمد وقلت
إنت تلاعبت بتوقيعي؟
أحمد اتلخبط وقال
أنا كنت مضطر أعمل كده ومكنش قدامي حل تاني
في اللحظة دي حسيت إن كل حاجة انتهت وإن الراجل اللي كنت فاكرة إني هعيش معاه عمري كله طلع مخطط لحياتي من قبل ما حتى ألبس فستان الفرح
لكن اللي حصل بعد كده كان أغرب بكتير
حماتي فجأة مدت إيدها وخطفت الملف من قدامي وبدأت تصرخ في عماد
إنت وعدتني إنك مش هتفتح الموضوع ده غير لما تاخد نصيبك من الفلوس
عماد رد عليها بغضب
أنا استنيت سنتين بسببك وإنتي كل مرة تقوليلي استنى لما أحمد يتجوز ونخلص الورق
بصيتلهم وأنا مش مصدقة
قلت
يعني إنتي كمان طرف في الموضوع يا طنط؟
حماتي سكتت للحظة وبعدين قالت جملة خلت جسمي يتجمد من الصدمة
أنا اللي دفعت أحمد إنه يتجوزك من الأساس
بصيت لأحمد وقلت
يعني إيه؟
ردت حماتي بمنتهى البرود
أبوك الغالي جدًا كان بينه وبين جوزي شراكة قديمة وفيه مبلغ كبير اختفى قبل ما يرحل وإحنا كنا عارفين إن عندك مستندات ممكن تثبت حقنا
حسيت إني مش قادرة أتنفس وقلت
مستندات إيه؟ أنا معرفش عن أي حاجة
حماتي ابتسمت وقالت
يبقى واضح إن أبوكي مخبيلك سر كبير
وفي اللحظة دي تليفوني رن




