منوعات

من اليوم بدات حياتي تتحول لجحيم

من اليوم ده بدأت حياتي تتحول لجحيم حقيقي. بقيت حاسة إني غريبة في بيتي، وكل ما أحاول أتعامل مع ملك بحنية كانت بتقابلني بتصرف أغرب من اللي قبله.

في يوم رجعت من شغلي بدري وكنت جايبة لها فستان جديد باللون الوردي عشان عرفت إنها بتحب اللون ده.

دخلت أوضتها ولقيتها قاعدة على السرير بتلعب بالموبايل.

قلت لها بابتسامة: بصي يا ملك جبتلك حاجة حلوة. إيه رأيك في الفستان ده؟ نفسي أشوفه عليكي.

بصت للفستان من غير اهتمام وقالت: مش عايزاه.

ضحكت وقلت: طيب لو مش عاجبك نبدله بحاجة تانية.

رفعت عينيها وبصتلي وقالت: إنتِ فاكرة نفسك أمي عشان تجيبلي فساتين؟

اتصدمت من طريقتها لكن حاولت أتماسك وقلت: لا يا حبيبتي أنا مش بحاول أخد مكان مامتك. أنا بس عايزاكي تكوني مبسوطة.

قامت من مكانها وخطفت الفستان من إيدي ورمته على الأرض وقالت: أنا عندي ماما ومش محتاجة واحدة تانية.

سكت شوية وبعدين خرجت من الأوضة من غير ما أقول أي حاجة.

كنت بحاول أقنع نفسي إن البنت لسه صغيرة ومجروحة من اللي حصل وإن تصرفاتها دي مجرد طريقة بتعبر بيها عن غضبها.

لكن المشكلة إن أحمد كان كل يوم بيصدق رواية جديدة منها.

مرة تقول له إني منعتها من مشاهدة التلفزيون ومرة تقول له إني قفلت عليها باب الأوضة ومرة تانية تدعي إني رفضت أديها مصروف المدرسة.

وفي كل مرة كان أحمد يرجع البيت ويبدأ يناقشني في اللي حصل.

لحد ما جه يوم الجمعة وكنت محضرة الغدا ومستنية أحمد يرجع من الشغل.

دخل البيت ومعاه ملك ووشه متغير.

قال من غير مقدمات: مريم عايز أتكلم معاكي.

بصيت له وقلت: خير يا أحمد؟

قال وهو بيحاول يتحكم في أعصابه: ملك قالتلي إنك بتزعقيلها كل يوم وإنك بتخوفيها وبتقولي لها إنك مش عايزاها تعيش معانا.

بصيت لملك اللي كانت واقفة وراه وقلت: ملك إنتِ قلتي لبابا الكلام ده؟

البنت نزلت راسها وبدأت تعيط.

أحمد اتعصب وقال: شايفة؟ حتى مش قادرة تبصي في عينك من الخوف! إنتِ مش حاسة بنفسك وإنتِ بتعامليها إزاي؟

قلت له وأنا مش مصدقة اللي بسمعه: يا أحمد أنا تعبت من الاتهامات دي. كل يوم حكاية جديدة وأنا مش عارفة أدافع عن نفسي قدام بنتك اللي إنت مش بتسمع غير كلامها.

رد بعصبية: دي بنت عندها سبع سنين! إنتِ المفروض تكوني أكبر من كده وتستحمليها.

قلت له: أنا استحملتها وحاولت أكون ليها أم تانية من غير ما أطلب منها تحبني أو تناديني ماما. لكن إنت مش سايبلي فرصة أعمل أي حاجة صح.

قرب مني وقال بحدة: أنا مش هسمحلك تزعلي بنتي تاني. ولو مش قادرة تتقبلي وجودها يبقى المشكلة فيكي إنتِ.

الكلمة دي وجعتني أكتر من كل اللي قاله قبل كده.

بصيت له وقلت: يعني أنا اللي اشتريت لها سرير وجهزت لها أوضة وساعدتها في المدرسة وكنت بصحى كل يوم أجهز لها أكلها وهدومها… أنا اللي مش متقبلاها؟

ما ردش.

كل اللي عمله إنه خد ملك ودخل أوضتها وقفّل الباب.

في الليلة دي ما نمتش.

فضلت قاعدة في الصالة وبفتكر كل حاجة حصلت من يوم ما البنت دخلت حياتنا.

وفجأة سمعت صوت خافت جاي من أوضة ملك.

قمت بهدوء وقربت من الباب عشان أطمن عليها.

كان صوتها وهي بتتكلم في التليفون.

سمعتها بتقول: أيوه يا ماما أنا عملت زي ما قولتيلي بالظبط.

وقفت مكاني من الدهشة.

ماما؟

هي بتكلم نسرين؟

كملت ملك بصوت واطي: بابا صدقني تاني وقال إنه مش هيخليني أقعد معاها لوحدي… أيوه هي زعلت وعيطت بس أنا مش فارق معايا.

سكتت شوية وبعدين قالت: طب إمتى هتيجي تاخديني؟ أنا مش عايزة أفضل هنا كتير.

حسيت إن رجلي مش شيلاني.

كنت لسه هخبط على الباب لما سمعتها بتقول جملة تانية خلت قلبي يدق بسرعة.

قالت: بس يا ماما إنتِ وعدتيني إنك هتخلّي بابا يطلقها وإننا هنرجع نعيش مع بعض في الشقة الكبيرة.

وبعدها ضحكت وقالت: متخافيش… أنا عارفة أخليه يكرهها.

رجعت خطوتين لورا وأنا حاسة إن الأرض بتلف بيا.

كل الاتهامات اللي اتعرضت لها كانت بتخطيط من أمها!

لكن السؤال اللي كان بيطاردني هو ليه نسرين عايزة تخليني أطلق من أحمد؟ وإيه مصلحتها في الموضوع بعد ما هي بنفسها تخلت عن بنتها؟

رجعت أوضتي وأنا مش قادرة أستوعب اللي سمعته.

قررت ما أواجهش ملك دلوقتي. كنت محتاجة دليل واضح عشان أحمد ما يقلبش الموضوع ضدي تاني.

تاني يوم الصبح استنيت أحمد يخرج لشغله، وبعدها دخلت أوضة ملك عشان أرتب هدومها.

وأنا بلم الهدوم من الدولاب وقعت مني علبة صغيرة كانت مستخبية تحت السرير.

فتحتها واتفاجئت إن جواها موبايل قديم.

كان عليه رسائل صوتية ومحادثات بين ملك ونسرين.

قلبي بدأ يدق بسرعة وأنا بفتح أول رسالة.

لكن قبل ما أسمعها سمعت صوت ملك ورايا بيقول ببرود:

إنتِ بتعملي إيه في حاجتي يا مريم؟

لفيت ناحيتها ولقيتها واقفة عند الباب ووشها متغير تماماً.

بصت للموبايل في إيدي وبعدين رفعت عيني وقالت:

إنتِ سمعتي إيه؟

ما رديتش.

قربت مني بسرعة وأخدت الموبايل من إيدي وقالت بصوت عالي:

إوعي تكوني فتحتي الرسائل دي!

في اللحظة دي عرفت إن اللي سمعته امبارح ما كانش مجرد كلام طفلة بتكرر كلام أمها.

كان في حاجة أكبر بكتير مستخبية ورا كل اللي بيحصل.

وبمجرد ما ملك خرجت من الأوضة وهي بتجري عشان تخبي الموبايل سمعت جرس الباب.

فتحت وأنا لسه في حالة دهشة.

لقيت حماتي أم أحمد واقفة قدامي، وأول ما شافت وشي سألتني بقلق:

مالك يا مريم؟ إنتِ عيطتي؟ في إيه؟

حاولت أبتسم وقلت: مفيش يا طنط… بس محتاجة أحكيلك على حاجة مهمة.

بصت ورايا ناحية أوضة ملك وقالت بصوت واطي:

قبل ما تحكيلي أي حاجة أنا عايزاكي تعرفي إن نسرين كلمتني امبارح وقالتلي إنها عايزة ترجع تاخد بنتها.

اتصدمت وقلت: ترجع تاخدها؟ بعد كل اللي عملته؟

هزت راسها وقالت: الموضوع مش كده يا بنتي… نسرين قالتلي كلام غريب جداً عن الشقة وعن أحمد وعن سبب جوازه منك.

حسيت إن قلبي وقف للحظة.

سألتها: سبب جوازه مني؟ هو في إيه يا طنط؟

بصتلي بعيون مليانة قلق وقالت:

يا مريم… إنتِ تعرفي إن أحمد كان عليه ديون كبيرة قبل ما يتجوزك؟ وإنه كان ممكن يخسر كل حاجة؟

وقبل ما ألحق أرد كملت كلامها بجملة كانت كفيلة تغير كل حاجة كنت مصدقاها عن جوازي:

نسرين قالتلي إن أحمد ما اتجوزكيش عشان بيحبك زي ما إنتِ فاكرة… ده كان عارف من أول يوم إن الشقة باسمك وإن عندك مدخرات كبيرة!

وساعتها بالظبط خرج أحمد من أوضة النوم ووقف قدامنا.

كان واضح من وشه إنه سمع آخر جملة.

وبص لأمه وقال بعصبية:

إنتِ بتعملي إيه هنا؟ ومين سمحلك تتكلمي في موضوع أنا قفلته من زمان؟

لكن حماتي ما ردتش عليه.

فضلت باصة له وبعدين قالت:

قولي الحقيقة يا أحمد… قبل ما أضطر أقول لمريم أنا اكتشفت إيه كمان!

أحمد وقف مكانه وكأن حد كب عليه جردل ميه ساقعة. بص لأمه وبعدين بص لي وقال بعصبية:

إنتوا الاتنين هتفضلوا واقفين تتكلموا في حياتي كده؟ دي أسرار بيني وبين مراتي ومحدش له دعوة بيها!

حماتي ردت عليه بصوت حازم: أسرار إيه يا أحمد؟ لما تبقى داخل على بنت الناس وإنت مخبي عنها إنك غرقان في الديون وإنك كنت بتدور على شقة وفلوس تسندك يبقى ده اسمه إيه؟

حاول يقاطعها لكنها رفعت إيدها وقالت: استنى واسمعني للآخر. أنا عرفت كل حاجة من نسرين. وعرفت كمان إنك كنت متفق معاها إن ملك تفضل عند مريم فترة لحد ما تقدروا تنفذوا اللي في دماغكم.

بصيت لأحمد وقلت بصوت مبحوح: يعني إيه متفقين؟ إنتوا كنتوا مخططين لكل ده من الأول؟

أحمد قرب مني وقال: مريم اسمعيني بس. الموضوع مش زي ما إنتِ فاهمة.

ضحكت بمرارة وقلت: طب فهمني يا أحمد. فهمني إزاي أم بنتك سابتها عندك فجأة وإنت كنت عارف؟ وإزاي كل مرة كانت بتتهمني فيها كنت بتصدقها من غير ما تسمعني؟ وإزاي كنت بتخليني أحس إني وحشة وأنا كل اللي عملته إني حاولت أحتوي طفلة مالهاش ذنب؟

أحمد سكت لحظة وبعدين قال: أنا كنت مضغوط. كان عليا ديون ومش عارف أتصرف. ونسرين قالتلي إن وجود ملك عندك هيخليكي تتعلقي بيها أكتر، وإنك هتوافقي تساعديني في أي حاجة عشان خاطرها.

حسيت إن نفسي اتسحب مني.

قلت له: يعني كنت بتستخدمني؟ كنت بتستخدم طيبتي وحبي لبنتك عشان توصل لفلوسي؟

رد بسرعة: أنا حبيتك يا مريم والله حبيتك. بس الظروف خلتني أعمل كده.

حماتي صرخت فيه: والظروف كمان خلتك تسيب بنتك تكذب على مراتك؟ خلتك تخلي طفلة تدخل في لعبة مؤذية بينك وبين أمها؟

في اللحظة دي ملك خرجت من أوضتها وكانت واقفة عند الباب ودموعها نازلة.

أحمد راح ناحيتها وقال: ملك ادخلي أوضتك يا حبيبتي.

لكن البنت ما اتحركتش.

بصت لي وقالت بصوت مرتعش: أنا آسفة يا مريم.

اتصدمت من كلامها.

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى