
أحمد كان واقف قدامي مش قادر يشيل عينه من الورقة اللي الدكتور ماسكها، وكل شوية يبصلي وبعدين يبص على بطني كأنه بيحاول يستوعب إزاي مراته اللي كان عايش معاها أربع سنين قدرت تخبي عنه سر بالحجم ده.
الدكتور بصله وقال بهدوء:
“حضرتك زوج المريضة؟”
أحمد رد بسرعة:
“أيوه أنا جوزها”.
الدكتور بص في الملف وقال:
“الحمل عمره تمانية شهور تقريبًا، وده معناه إن المدام كانت حامل قبل ما يحصل الانفصال بفترة طويلة، لكن واضح إنها مكنتش بتتابع مع حضرتك”.
أحمد بصلي بصدمة وقال:
“يعني إنتِ كنتِ عارفة من أول يوم؟”
رديت وأنا تعبانة:
“أيوه كنت عارفة”.
قرب مني خطوة وقال بصوت مكسور:
“وإزاي قدرتي تعيشي معايا كل ده ومتقوليش؟ ده ابني يا منى”.
ضحكت ضحكة صغيرة كلها وجع وقلتله:
“ابنك اللي إنت بنفسك قلت الحمد لله إنه مش موجود عشان ميتبهدلش وسط مشاكلنا؟”
سكت أحمد ونزل عينه في الأرض.
الدكتور طلب منه يسيبني أرتاح، وإن أي انفعال ممكن يضر حالتي وحالة الجنين. وبعد ما خرج أحمد فضل واقف بره الأوضة مش عارف يعمل إيه.
مريم دخلتلي وقعدت جنبي ومسكت إيدي:
“إنتِ لازم ترتاحي ومتفكريش في أي حاجة دلوقتي”.
بصيتلها وقلت:
“أنا مش خايفة من الولادة يا مريم، أنا خايفة من اليوم اللي ابني يسألني فيه عن أبوه وأضطر أحكيله إنه كان موجود طول الوقت بس اختار ميبقاش موجود”.
في الناحية التانية أحمد كان قاعد على كرسي في طرقة المستشفى وحاطط إيده على راسه.
افتكر كل مرة كنت بتعب فيها وأقوله إني محتاجة أنام بدري، وكل مرة كنت برفض أطلع معاه مشوار طويل، وكل مرة كان بيلاقيني باكل حاجات غريبة أو بطلب منه يجيبلي فاكهة في نص الليل.
كل التفاصيل اللي كان شايفها عادية بدأت تتجمع قدامه.
وفجأة تليفونه رن.
كانت أمه نادية.
رد عليها وهو مش قادر يتكلم:
“إيه يا أحمد؟ وصلت لمراتك؟ طمني عملت إيه؟”
قالها بصوت مخنوق:
“منى حامل يا ماما”.
سكتت ثواني وبعدين قالت بحدة:
“حامل إزاي؟ وإنتوا كنتوا بتقولوا مفيش أطفال!”
أحمد رد بعصبية:
“إحنا مكناش بنقول يا ماما، أنا اللي قلت كده وهي كانت حامل من قبلها”.
نادية اتلخبطت لكن سرعان ما قالت:
“طب كويس اهو ربنا بعتلك عيل يصلح اللي بينكم، لازم ترجعها البيت فورًا”.
أحمد غمض عينه وقال:
“الموضوع مش بالسهولة دي يا ماما”.
لكن أمه مردتش على كلامه وقالت:
“اسمعني كويس، إنت لازم تاخد ابنك وتربيه في بيتك، وأنا مش هسيب حفيدي يتربى بعيد عن عيلته”.
أحمد حس لأول مرة إن أمه مش بتفكر فيا ولا حتى في الطفل، كل اللي شاغلها إنها تفرض سيطرتها على حياتنا من جديد.
قفل معاها ودخل عندي تاني.
كان شايل في إيده كيس صغير فيه عصير وفاكهة.
حطه على الترابيزة وقرب من السرير:
“منى، أنا عارف إني غلطت في حقك، بس خلينا نبدأ من جديد عشان ابننا”.
بصيتله وقلت:
“إنت فاكر إن المشكلة في كلمة طلاق يا أحمد؟ المشكلة إنك سبتني لوحدي وأنا محتاجاك، وخلتني أحس إني مليش قيمة عندك”.
قال بسرعة:
“أنا مكنتش أعرف إنك حامل”.
رديت عليه:
“ولو كنت عرفت كنت هتعمل إيه؟ كنت هتدافع عني قدام أمك؟ ولا كنت هتطلب مني أسكت برضه عشان خاطرها؟”
معرفش يرد.
وبعد شوية خرجت الممرضة عشان تطمن على حالتي، وبعدها دخلت مريم وهي شايلة شنطة هدومي.
أحمد بص للشنطة وسأل:
“إنتوا رايحين فين؟”
مريم ردت قبل ما أتكلم:
“منى هتخرج وتيجي معايا”.
أحمد اتفاجئ:
“معاكي إنتِ؟ دي مراتي وبيتي موجود”.
بصيتله وقلت:
“أنا مش هرجع الشقة يا أحمد”.
وقف قدامي وقال برجاء:
“طب على الأقل اديني فرصة أصلح اللي عملته”.
وقبل ما أرد عليه موبايله رن تاني.
كانت أمه.
المرة دي فتح المكالمة وحطها على السماعة من غير ما يقصد يسمعني كلامها.
صوتها طلع عالي وهي بتقول:
“أنا تحت المستشفى ومعايا محامي العيلة، وجاية أخلص موضوع حفيدي”.
أحمد وقف مصدوم وبصلي.
أما أنا فحسيت إن اللي جاي أكبر بكتير من مجرد خلاف بين زوجين.
لأن حماتي اللي عمرها ما سألت عني ولا اهتمت بتعبي قررت فجأة تظهر في حياتي.
لكن المفاجأة إنها مكنتش جاية تطمن عليا.
كانت جاية ومعاها ورق وعايزة مني أمضي عليه قبل ما أخرج من المستشفى.
أول ما سمعت صوت حماتي نادية وهي بتقول إنها جاية ومعاها محامي العيلة حسيت إن قلبي اتقبض.
أحمد بصلي وقال بتوتر:
“منى، متقلقيش، أنا مش هسمح لماما تضايقك”.
بصيتله وقلت بمرارة:
“الغريبة إنك فاكر دلوقتي إنك تقدر تمنعها تضايقني، مع إنك طول جوازنا مكنتش بتعرف تعمل كده”.
قبل ما يرد الباب اتفتح ودخلت نادية بخطوات سريعة ووراها راجل في أواخر الخمسينات شايل ملف كبير.
بصتلي من فوق لتحت وبعدين قالت:
“حمد لله على سلامتك يا بنتي”.
مكنش في صوتها أي حنية.
رديت ببرود:
“الله يسلمك”.
قربت من السرير وبصت على بطني وقالت:
“المهم دلوقتي نحافظ على حفيدي وميحصلش أي مشاكل تاني”.
أحمد اتدخل وقال:
“ماما، مش وقته الكلام ده”.
لكنها تجاهلته وفتحت الملف وطلعت ورقتين:
“دي ورقة إقرار إن الطفل بعد الولادة هيكون تحت رعاية والده، وإن كل حاجة تخصه هتكون بموافقة العيلة”.
بصيت للورق باستغراب وقلت:
“يعني إيه الكلام ده؟”
المحامي اتكلم بهدوء مصطنع:
“دي مجرد ترتيبات عائلية يا مدام منى، عشان نضمن حقوق الطفل”.
مسكت الورقة وبدأت أقراها، ولقيت كلام واضح بيقول إني بتنازل عن حقي في اتخاذ القرارات الخاصة بالطفل، وإن إقامة الطفل الأساسية هتكون في بيت والده.
رفعت عيني لنادية وقلت:
“إنتِ عايزاني أمضي على تنازل عن ابني وأنا لسه في المستشفى؟”
نادية اتعصبت وقالت:
“متكبريش الموضوع يا منى، إنتِ واحدة داخلة على طلاق ومش هتعرفي تربي طفل لوحدك، وأحمد ابني عنده بيت وعنده إمكانيات”.
أحمد بص لأمه بصدمة:
“إنتِ بتقولي إيه يا ماما؟”
ردت عليه من غير ما تبصله:
“بفهمها مصلحتها يا أحمد”.
في اللحظة دي حسيت إن كل اللي حصل في الشهور اللي فاتت رجع قدامي مرة واحدة.
أنا اللي كنت بشتغل وأتعب وأوفر فلوس عشان أعمل لنفسي مشروع.
وأنا اللي كنت بخبي حملي وسط وجعي عشان مكنش عندي حد أقدر أتكلم معاه.
ودلوقتي نفس الناس اللي سابوني لوحدي عايزين ياخدوا مني ابني قبل حتى ما أشوف وشه.




