
سعاد فضلت تخبط على الباب بعصبية وهي بتقول افتح يا محمود أنا مش هسيبك تخبي عني حاجة أنا عارفة إنك اديت ندى الملف
جدي بصلي بسرعة وقال بصوت واطي
خدي الملف وحطيه في شنطتك ومتطلعيش أي ورقة منه مهما حصل
مسكت الملف وإيدي بتترعش وسألته
يا جدي هو إيه اللي فيه؟ وليه خالتي قلقانة منه بالشكل ده؟
بصلي بحزن وقال
علشان الناس اللي طول عمرها بتتكلم عن الأمانة والشرف ساعات بتكون أكتر ناس محتاجة تتفضح
الباب اتفتح فجأة ودخلت خالتي سعاد وهي وشها أحمر من الغضب
بصتلي وبعدين بصت للشنطة اللي في إيدي وقالت
إنتِ خدتي الملف؟ رجعيه مكانه حالا
وقفت قدامها وقلت
ده ملف جدي وهو حر يديه لمين
ضحكت بسخرية وقالت
جدي؟ هو أنتِ فاكرة إنك أقرب واحدة ليه؟ أنا اللي بقالي سنين بخدمه وبصرف عليه وبروح معاه للدكاترة وأنتِ كل اللي بتعمليه شوية زيارات
جدي خبط بعصايته على الأرض وقال
كفاية يا سعاد بقى أنا مش طفل علشان تتحكمي فيا
سعاد قربت منه وقالت بصوت هادي مصطنع
يا بابا أنا قلقانة عليك بس البنت دي بتستغلك وعايزة تاخد منك الورق علشان الميراث
جدي رد عليها بقوة رغم تعبه
الميراث ده ماليش دعوة بيه دلوقتي أنا عايز أعرف الفلوس اللي اختفت من حسابي راحت فين
وش خالتي اتغير فجأة وسكتت
أنا بصيت لجدي بدهشة وسألته
فلوس إيه يا جدي؟
طلع نفس طويل وقال
من تلات سنين وأنا كل شهر بلاقي مبالغ بتتسحب من حسابي من غير ما أعرف واللي كانت معاها الكارت هي سعاد
خالتي انفجرت في الكلام وقالت
إنت بتتهمني بالاستيلاء يا بابا؟ بعد كل اللي عملته علشانك؟
جدي رد بهدوء
أنا مش بتهم حد أنا بس عايز أشوف الحقيقة
سعاد بصتلي بغضب وقالت
خليكي في حالك يا ندى دي مشاكل عيلة ومش من حقك تتدخلي فيها
وقتها رن جرس الباب مرة تانية
دخل أحمد ومعاه راجل كبير في السن كان شايل شنطة جلد وقال
مساء الخير يا جدي أنا جبت الأستاذ عادل المحامي زي ما طلبت
سعاد اتجمدت مكانها أول ما شافت المحامي
الأستاذ عادل سلم على جدي وقعد وفتح شنطته وطلع منها شوية أوراق
وقال
زي ما اتفقنا يا أستاذ محمود أنا راجعت كشوف الحسابات وصور التحويلات اللي حضرتك بعتها لي
سعاد بدأت تتراجع خطوة لورا
جدي بص لها وقال
أنا كنت مستني اليوم اللي أعرف فيه مين من ولادي بيحبني ومين مستني رحيلي علشان ياخد اللي ورايا
المحامي طلع ورقة وحطها قدامنا وقال
في تحويلات اتعملت من حساب حضرتك لحساب شركة باسم شخص قريب جدا من العيلة والمبالغ دي وصلت لأكتر من مليون جنيه
أنا حسيت الدنيا بتلف بيا وسألت
مين صاحب الشركة دي؟
المحامي بص ناحية سعاد وبعدين رجع بص لجدي وقال
الشركة مسجلة باسم زوج حضرتك يا أستاذة سعاد
سعاد صرخت وقالت
كدب! الورق ده متفبرك وأنا مش هسمح لحد يظلمني
لكن جدي رفع إيده وقال
استني يا سعاد لسه في حاجة تانية
فتح الملف الأصفر وطلع منه صورة عقد قديم وقال
فاكرة البيت اللي في البلد اللي كنتِ مصممة أكتبلك بيعه؟ البيت ده اتسجل من غير علمي من فترة باسم شركة جوزك
سعاد وقعت على الكرسي ووشها بقى أصفر
أحمد بصلي وبعدين بص لجدي وقال
يا جدي هو أنت كنت عارف كل ده من إمتى؟
جدي رد وهو بيبص في عين بنته
من سنة كاملة لكن كنت مستني أشوف هتعمل إيه لما تعرف إني تعبان ومش قادر أتحرك
سعاد بدأت تعيط وتقول
يا بابا والله أنا كنت بعمل كل ده علشان أأمن مستقبل ولادي
جدي قال بحزن
مستقبل ولادك مش هيتبني على تعب عمرك وأخذ حقك يا بنتي
وفجأة خبط المحامي على الورقة وقال
فيه مشكلة أكبر من كل ده لازم تعرفوها قبل ما أي حد يمشي
كلنا بصيناله وهو طلع ورقة تانية من الملف وقال
التوكيل اللي اتعمل باسم الأستاذة سعاد واللي بيسمح لها تتصرف في ممتلكات والدها فيه توقيع مش بتاع الأستاذ محمود أصلا
جدي رفع عينه بصدمة وقال
يعني إيه يا أستاذ عادل؟
المحامي رد بصوت حاسم
يعني يا أستاذ محمود فيه حد زور توقيع حضرتك واستعمل التوكيل علشان ينقل ملكية أملاكك من غير موافقتك
ساعتها سعاد قامت من مكانها وهي بتصرخ
أنا معملتش حاجة لوحدي! هو اللي كان بيخلص كل الورق وبيتصرف!
المحامي سألها بسرعة
مين هو؟
سعاد بصت ناحية أحمد وقالت وهي بتترعش
اسألوا ابنكم الكبير هو عارف كويس مين اللي كان بيزور الإمضا وبيمضي مكان أبوه!
أحمد اتجمد مكانه وبص لأخته للحظة وبعدها بص لجده وقال
أنا مش فاهم هي بتتكلم عن مين
لكن جدي كان باصصله بنظرة غريبة وكأنه افتكر حاجة قديمة
وقال بصوت مبحوح
أحمد… إنت كنت عارف إن في حد بيزور توقيعي؟
وأحمد قبل ما يرد قال جدي جملة خلتني أحس إن السر أكبر بكتير من مجرد فلوس وميراث
اللي كان بيزور إمضتي مش غريب عن البيت ده… ده كان بيدخل أوضتي بمفتاحه كل يوم!
أحمد فضل واقف مكانه مش قادر ينطق وكأن كلام جدي نزل عليه زي الصاعقة
بص لجده وقال بصوت متوتر
يا جدي أنا عمري ما دخلت أوضتك من غير إذنك ولا عمري لمست ورقة تخصك
جدي هز راسه وقال
أنا مقولتش إنك أنت اللي زورت إمضتي يا أحمد أنا بقول إن اللي عمل كده كان معاه مفتاح أوضتي وكان عارف كل تحركاتي
سعاد كانت واقفة وبتبص في الأرض وبتفرك إيديها بتوتر
المحامي عادل فتح شنطته وطلع ورقة تانية وقال
أنا عندي معلومة لازم تعرفوها الشخص اللي استعمل التوكيل المزور حاول يبيع قطعة أرض تانية في الشرقية من أسبوعين لكن الصفقة وقفت بسبب إن المشتري اكتشف إن فيه مشكلة في الملكية
جدي ضرب بعصايته على الأرض وقال
يعني الموضوع لسه مستمر؟
المحامي رد
للأسف أيوه وفيه حاجة أخطر من كده الشخص اللي قدم التوكيل في الشهر العقاري كان اسمه شريف جوز سعاد
أنا بصيت لخالتي وقلت
يعني جوزك هو اللي كان بيعمل كل ده؟
سعاد بدأت تعيط وقالت
أنا معرفش حاجة عن التوكيل ده والله شريف كان بيقولي إنه بيأمن مستقبلنا وإن بابا موافق على كل حاجة
جدي بص لها بحزن وقال
وأنتِ صدقتيه من غير ما تسأليني؟ ولا كان عاجبك إنك تاخدي اللي مش من حقك؟
سعاد نزلت راسها ومردتش
وفجأة أحمد قرب من جدي وقال
يا جدي أنا لازم أعترفلك بحاجة أنا من فترة لقيت ظرف قدام باب شقتي فيه صور من عقود ملكيتك وصور تحويلات بنكية لكن مكنتش فاهم معناها وافتكرت إن حد بيحاول يوقعني في مشكلة
جدي بصله باستغراب وقال
والظرف ده فين دلوقتي؟
أحمد رد
موجود في الورشة عندي ومحافظ عليه زي ما هو
المحامي قال بسرعة
لازم نجيبه فورًا لأن ممكن يكون دليل مهم
أحمد بصلي وقال
ندى تعالي معايا نجيبه ونرجع
خرجنا من الشقة وإحنا مش عارفين إيه اللي مستنينا ولما وصلنا الورشة دخل أحمد على طول وفتح درج مكتبه وطلع ظرف بني قديم
فتحه قدامي وطلع منه صور وأوراق كتير لكن اللي شد انتباهي صورة كان مكتوب على ظهرها بخط إيد جدي
لو حصل لي حاجة سلموا الملف لندى فقط
قلبي دق بسرعة وبصيت لأحمد وقلت
يعني جدي كان مجهز كل حاجة من قبل ما نعرف؟
أحمد مسك الصورة وقلبها ولقي على ظهرها تاريخ من ست شهور




