
الباب اتفتح فجأة وكل اللي في القاعة لفوا يبصوا ناحية الداخل وكانت المفاجأة إن اللي دخل راجل في أواخر الخمسينات ماسك شنطة جلد قديمة ووشه باين عليه الإرهاق لكنه كان ثابت الخطوات
الحاجة نادية أول ما شافته قامت من مكانها وقالت بصوت متأثر
إنت إيه اللي جابك هنا؟!
الراجل مردش عليها لكنه قرب من القاضية وقال
بعد إذن المحكمة أنا اسمي عماد الشناوي وكنت شغال مدير حسابات في شركة أحمد المنشاوي لمدة أكتر من عشر سنين وعندي مستندات لازم تتقدم قبل ما الحقيقة تضيع
محامي أحمد وقف بسرعة وقال بعصبية
اعتراض يا فندم إحنا منعرفش الشخص ده ولا نعرف جاي منين
عماد فتح شنطته وطلع منها ملفات كتير وحطها قدام القاضية
أنا مش جاي أتهم حد من غير دليل أنا جاي أقدم كشوف حسابات وتحويلات بنكية تثبت إن فلوس مدام سارة اتسحبت على مراحل واتنقلت لشركة وهمية وبعدها اتستخدمت في شراء شقة في التجمع الخامس
سارة بصت للراجل بصدمة لأنها أول مرة تشوفه في حياتها
منى قربت منها وهمست
واضح إن في حد كان مستني اللحظة دي علشان يتكلم
القاضية طلبت من عماد يوضح علاقته بالموضوع
عماد أخد نفس طويل وقال
أنا كنت بنفذ تعليمات المدير بس بعد فترة اكتشفت إن التحويلات دي مش قانونية وإن في توقيعات اتزورت باسم مدام سارة ولما اعترضت اتطلب مني أسكت واتحذرت إني أخسر شغلي
الحاجة نادية بدأت تتوتر وقالت
كلام فارغ الراجل ده بيحاول ينتقم من ابني علشان مشي من الشركة
عماد لف ناحيتها وقال
لو كنت عايز أنتقم كنت اتكلمت من زمان لكن أنا سكت علشان كنت حريص على ولادي ولما عرفت إن مدام سارة اتعرضت للظلم قررت أقول الحقيقة
منى فتحت ملف من الملفات وسألت
طيب ممكن توضح للمحكمة مين اللي طلب فتح الحساب باسم حضرتك؟
عماد سكت لحظة وبعدين بص ناحية الحاجة نادية وقال
الحساب اتفتح بتعليمات من الحاجة نادية شخصيًا وكانت هي اللي بتستلم صور التحويلات وبتحدد المبالغ اللي تخرج من حساب الشركة
الحاجة نادية صرخت
كداب!
القاضية خبطت بالمطرقة وطلبت الهدوء
لكن عماد كمل كلامه وطلع ورقة تانية
وفي حاجة أخطر من كده يا فندم فيه تحويل بمبلغ ميتين ألف جنيه اتعمل قبل شراء الشقة بيوم واحد والتحويل ده خرج من حساب مدام سارة ودخل حساب باسم شخص تاني غير الحاجة نادية
سارة حسّت إن قلبها بيدق بسرعة وسألت من غير ما تقصد
مين الشخص ده؟
عماد بص لها بحزن وقال
الشخص ده هو اللي كان بيقابل أحمد في السر وبيساعده ينقل الفلوس من غير ما حد يعرف
القاضية طلبت منه يقول الاسم بوضوح
عماد قرب الورقة منها وقال
الاسم هو ريهام حسن
سارة اتسمرت مكانها
يعني ريهام عشيقة أحمد مكانتش مجرد واحدة دخلت حياته وخلاص دي كمان كانت جزء من خطة سلب فلوسها
منى مسكت إيد سارة وقالت بهدوء
تماسكي إحنا لسه في البداية
الحاجة نادية حاولت تخرج من القاعة لكن فرد الأمن وقفها وطلب منها تستنى لحد ما القاضية تسمح لها
القاضية أمرت بإثبات كل المستندات في محضر الجلسة وقررت إحالة الأوراق للجهات المختصة لفحص التحويلات والتوقيعات وطلبت عدم التصرف في العقار محل النزاع لحين انتهاء الفحص القانوني
محامي أحمد كان بيحاول يتصل بموكله لكن موبايله مقفول
وفي نفس الوقت كان أحمد قاعد في عيادة خاصة في القاهرة جنب ريهام وهي بتبص على صورة السونار وبتضحك
قالت له وهي بتشاور على الشاشة
شايف؟ ده ابننا يا أحمد
ابتسم أحمد وقال
أهم حاجة تكوني إنتي والبيبي بخير
لكن قبل ما يكمل كلامه موبايله اشتغل برسالة من محاميه
إلحق نفسك فورًا فيه مستندات ظهرت في المحكمة والحاجة نادية اتورطت في التحويلات
ابتسامته اختفت ووشه اتغير
ريهام لاحظت وسألته
مالك؟ في إيه؟
أحمد قام بسرعة وقال
لازم أمشي حالًا
مسكت إيده وقالت بقلق
تمشي فين؟ وإحنا لسه مخلصناش؟
بصلها بعصبية وقال
اسكتي دلوقتي مش ناقص وجع دماغ
خرج من العيادة واتصل بمحاميه لكن أول ما سمع التفاصيل حس إن كل حاجة كان مخطط لها بدأت تنهار
وفي المحكمة سارة كانت خارجة مع منى لما عماد قرب منها وقال
مدام سارة أنا عارف إن اللي حصل صعب عليكي بس في مستند واحد لسه متقدمش للمحكمة ولو ظهر ممكن يغير القضية كلها
سارة بصت له باستغراب وقالت
مستند إيه تاني؟
عماد قرب منها وخفض صوته وقال
في عقد بيع للشقة اللي في التجمع باسم شخص تالت لكن اللي مضى عليه كشاهد كان شخص إنتي تعرفيه كويس جدًا
سارة حسّت ببرودة في جسمها وسألته
مين؟
عماد فتح موبايله ووراها صورة من العقد
سارة بصت للصورة واتراجعت خطوة لورا وحطت إيدها على بقها من الصدمة
لأن الشاهد اللي مضى على العقد كان والدها اللي رحل من خمس سنين!
سارة رفعت عينيها لعماد وقالت بصوت مرتعش
إزاي ده حصل؟ بابا رحل من خمس سنين!
عماد رد عليها بجملة خلتها تحس إن اللي اكتشفته لحد دلوقتي مجرد بداية
لأن يا مدام سارة فيه حد استخدم أوراق والدك بعد رحيله وده معناه إن الموضوع بدأ قبل جوازك من أحمد بوقت طويل…
سارة فضلت باصة للصورة اللي على موبايل عماد ومش قادرة تستوعب اللي شايفاه وفضلت تكرر نفس السؤال بصوت بيرتعش
إزاي بابا يمضي على عقد بعد رحيله بخمس سنين؟ هو إنتوا بتتكلموا عن إيه؟
عماد بص حواليه واتأكد إن محدش قريب منهم وبعدين قال
أنا عارف إن الكلام صعب تصدقيه بس والدك كان عنده خزنة في بنك قديم في القاهرة والخزنة دي كان فيها مستندات تخص أرض كبيرة في العبور كان والدك شريك فيها مع مجموعة من رجال الأعمال
سارة هزت راسها وقالت
بابا عمره ما حكالي عن أي أرض ولا عن شراكة مع حد
عماد رد بهدوء
لأنه كان حريص عليكي وكان عارف إن في ناس بتراقب كل تحركاته قبل رحيله بفترة
منى المحامية تدخلت وقالت
استنى يا أستاذ عماد إنت كده بتفتح موضوع أكبر بكتير من قضية الطلاق إحنا محتاجين نفهم كل حاجة بالدليل
عماد فتح شنطته وطلع صورة قديمة لرجل واقف جنب والد سارة قدام مبنى كبير




