
جريت ورا مروان وأنا بنادي عليه بصوت عالي:
ـ استنى! إنت رايح فين؟ وإيه اللي بيحصل فوق ده؟!
لكنه مكنش بيرد وكان طالع السلم بسرعة وكأنه عارف بالظبط إيه اللي مستنيه فوق.
أول ما وصلنا للدور التاني وقف قدام الأوضة اللي جدي كان مانعني أقرب منها طول حياتي، والباب كان مفتوح فتحة صغيرة والنور اللي جواها كان بينور ويطفي بشكل غريب.
مروان قرب من الباب ووقف فجأة وبصلي:
ـ مهما حصل متدخليش ورايا.
ـ إنت فاكرني هفضل واقفة أتفرج؟ دي أوضة جدي وبيتي وأنا من حقي أعرف كل حاجة.
مد إيده ناحية الباب وزقه بالراحة.
الأوضة كانت مليانة دواليب قديمة وصناديق خشب وكتب مترتبة فوق بعضها، لكن اللي لفت نظري إن في درج كبير كان مفتوح وعلى الأرض صور ورق كتير متبعتر.
مروان دخل وهو بينادي:
ـ يا عم محمود… إنت هنا؟
اتسمرت مكاني:
ـ إنت بتكلم مين؟!
قبل ما يرد سمعنا صوت حركة ورا الدولاب الكبير الموجود في آخر الأوضة.
مروان قرب منه بحذر وأنا فضلت واقفة عند الباب ماسكة الموبايل ومستعدة أتصل بالأمن في أي لحظة.
وفجأة ظهر راجل كبير في السن كان قاعد مستخبي ورا الدولاب ووشه شاحب وهدومه قديمة.
صرخت من الخضة ورجعت خطوتين لورا.
الراجل رفع إيده وقال بصوت مبحوح:
ـ متخافيش يا بنتي أنا مش هضايقك.
مروان قرب منه بصدمة:
ـ عم رجب؟! إنت بتعمل إيه هنا؟!
الراجل بصله وقال:
ـ كنت مستنيك ترجع يا أستاذ مروان… الحاج محمود الله يرحمه قاللي لو حصل أي حاجة وظهر حد غريب في البيت أدي الأمانة لصاحبة البيت.
بصيتله وأنا مش فاهمة:
ـ أمانة إيه؟!
عم رجب مد إيده تحت الدولاب وطلع صندوق خشب صغير عليه قفل قديم:
ـ دي أمانة والدتك يا بنتي.
حسيت إن رجلي مش شايلاني:
ـ أمي؟! إيه اللي يخص أمي في الموضوع ده؟!
عم رجب بص لمروان وكأنه مستني منه إذن يتكلم، ومروان هز راسه بالراحة.
الراجل حط الصندوق على الترابيزة وطلع مفتاح صغير من سلسلة كانت في رقبته وفتح القفل.
جوا الصندوق كان فيه جواب قديم وصورة لأمي وهي صغيرة وراجل واقف جنبها مش جدي ولا أبويا.
مسكت الصورة بإيد بتترعش وقلبي كان بيدق بعنف:
ـ مين الراجل ده؟
عم رجب نزل عينه وقال:
ـ ده والدك الحقيقي يا بنتي.
ضحكت ضحكة عصبية من الصدمة:
ـ إنت بتقول إيه؟ أبويا الحقيقي غاب من زمان ولا إيه؟ أنا أبويا سابني وأنا صغيرة!
مروان قرب مني وقال:
ـ سلمى لازم تسمعيني للآخر قبل ما تحكمي على أي حاجة.
فتحت الجواب بسرعة وبدأت أقرأ أول سطر:
يا بنتي الغالية لو الورقة دي وصلت لإيدك يبقى أنا فشلت إني أحكيلك الحقيقة بنفسي، وعايزاكي تعرفي إن أبوكي عمره ما سابك زي ما قالولك.
وقفت عن القراءة وحسيت إن عيني مليانة دموع.
كملت وأنا مش قادرة أتنفس:
أبوكي كان بيحبك وكان مستعد يضحي بكل حاجة عشانك، لكن في يوم اكتشفنا إن في ناس من العيلة بيخططوا ياخدوا أرض جدك وفلوسه، ووقتها اتعرض لضغوط خلتنا نضطر نخبيكي بعيد عن كل المشاكل.
رفعت عيني ناحية مروان:
ـ إنت كنت تعرف الكلام ده؟
هز راسه وقال:
ـ كنت أعرف جزء منه بس مكنتش أعرف إن والدتك سابتلك جواب.
رجعت أبص للرسالة وكملت:
البيت اللي إنتي عايشة فيه مش مجرد ميراث يا سلمى، فيه مستندات وأوراق تثبت إن أرض جدك اتباعت أكتر من مرة من غير علمه، وإن فيه شخص استغل غيابه ومرضه عشان ياخد حقه.
وقبل ما أوصل لنهاية الرسالة سمعت صوت عم رجب وهو بيقول:
ـ فيه حاجة تانية لازم تعرفيها يا بنتي.
بصيتله:
ـ إيه هي؟
قال بصوت مرتعش:
ـ الراجل اللي في الصورة مش والدك الحقيقي بس… ده كمان لسه عايش.
حسيت إن الدنيا بتلف بيا:
ـ عايش؟! يعني إيه عايش؟ فين؟!
عم رجب أشار للصورة وقال:
ـ آخر مرة شفته كان من شهرين وكان بيسأل عليكي بالاسم.
مروان مسك الصورة وبص فيها بتركيز وبعدها وشه اتغير تمامًا:
ـ لا… مش معقول.
سألته وأنا على وشك الانهيار:
ـ إنت تعرفه؟!
رفع عينه ليا وقال:
ـ أيوه يا سلمى… وده معناه إن كل اللي حصل من سبع سنين مكنش مجرد صفقة بيع وشراء.
وقبل ما أقدر أسأله سمعنا صوت عربية بتقف قدام البيت وبعدها صوت حد بيخبط على الباب الرئيسي بعنف.
عم رجب اتخض ورجع لورا وقال:
ـ ده هو… رجع تاني!
مروان بص من الشباك وشحب وشه:
ـ لازم ننزل دلوقتي ونقفل كل الأبواب.
لكن قبل ما نتحرك موبايلي رن وظهر على الشاشة رقم مجهول.
رديت وأنا إيدي بتترعش وسمعت صوت راجل كبير بيقول بهدوء غريب:
ـ سلمى… أنا عارف إنك فتحتي الصندوق وعرفتي جزء من الحقيقة.
سكت لحظة وبعدها قال:
ـ بس لو عايزة تعرفي ليه أمك غابت وهي خايفة، وليه جدك باع البيت لمروان من غير ما يسلمهوله، لازم تسمعيني كويس.
بلعت ريقي وسألته:
ـ إنت مين؟
جالي الرد اللي خلاني أقع على الكرسي من الصدمة:
ـ أنا أبوكي يا سلمى… وأنا واقف دلوقتي قدام باب بيتك، افتحيلي قبل ما الشخص اللي معاكي يدفن آخر سر في العيلة للأبد!
فضلت ماسكة الموبايل ومش قادرة أتكلم وببص لمروان اللي كان واقف قدامي ووشه اتغير تمامًا أول ما سمع صوت الراجل:
ـ سلمى اقفلي المكالمة ومتفتحيش الباب.
صرخت فيه وأنا دموعي نازلة:
ـ إنت مين فيكم اللي بيكدب عليا؟! أمي قالتلي إن أبويا سابنا ومشي، وإنت بتقولي إنك تعرف الحقيقة، ودلوقتي في واحد بيقول إنه أبويا وواقف بره بيطلب مني أفتحله!
الصوت اللي في الموبايل رجع يتكلم:




