
منى فضلت واقفة قدام ترابيزة السفرة وعينيها بتتنقل بين الطبقين والكارت اللي مكتوب عليه اسم حماتها وبين الكرسي الفاضي اللي المفروض يكون مكانها
حست للحظة إنها غريبة في بيتها وإن كل التعب اللي تعبته من الصبح مالوش أي قيمة عند الناس اللي عايشة معاهم
رجعت المطبخ بهدوء وحطت الإيصالات في جيبها وقررت إنها مش هتواجه حسام دلوقتي
بعد شوية سمعت جرس الباب وعرفت إن نوال وصلت
دخلت حماتها وهي شايلة شنطتها وبتتكلم بصوت عالي
كل سنة وإنت طيب يا حبيبي يا حسام وحشتني أوي
حسام جري عليها وحضنها وباس إيديها وبعدها أخد منها الشنطة
نوال بصت ناحية المطبخ وقالت
هي منى لسه مخلصتش الأكل؟ أنا من الصبح ماكلتش ومستنية العزومة دي
حسام ضحك وقالها
متقلقيش يا أمي كل حاجة جاهزة
منى خرجت من المطبخ وهي شايلة طبق السلطة وحطته على السفرة
نوال بصتلها من فوق لتحت وقالت
إيه يا منى هو إنتي لسه لابسة مريلة المطبخ؟ روحي غيري هدومك شوية بدل ما تقعدي قدامنا كده
منى ردت بابتسامة باردة
حاضر يا طنط
نوال عقدت حواجبها وقالت
طنط إيه بس بعد كل السنين دي؟ هو أنا لسه غريبة عنك؟
منى بصتلها وقالت
على حسب المعاملة يا نوال هانم
حسام بص لمراته بحدة وقال
منى مش وقته الكلام ده
منى ما ردتش ودخلت المطبخ تاني
بعد دقائق سمعت صوت نوال وهي بتسأل ابنها
إنت متأكد إنك عملت اللي اتفقنا عليه؟
حسام رد بصوت واطي
أيوه يا ماما الفلوس اتسحبت والورق كله خلصان ومفيش حاجة تقلق
منى حسّت إن قلبها دق بسرعة
الفلوس اتسحبت؟
والورق خلصان؟
فتحت درج المطبخ وطلعت الإيصالات تاني وبصت فيهم كويس
لاحظت إن إيصال محل الدهب كان فيه رقم فاتورة طويل وتحت الرقم مكتوب اسم المشتري حسام عبد الرحمن
لكن اللي شد انتباهها أكتر إن فيه رقم تليفون مكتوب بخط اليد على ظهر الإيصال
صورت الإيصال بموبايلها وقررت تحتفظ بكل حاجة
خرجت بعد شوية وهي شايلة صينية اللحمة وبدأت تحط الأكل على السفرة
نوال بصت للصينية وقالت بضيق
هو أنا مش قلتلك إني عايزة سمك؟ إنتي ليه مصممة تعملي اللي على مزاجك؟
منى حطت الصينية على الترابيزة وقالت بهدوء
السمك ماكانش ضمن الاتفاق يا نوال هانم
نوال بصت لحسام مستنية منه يتدخل لكنه اكتفى إنه يقول
خلاص يا ماما كلي اللي موجود
منى بدأت ترفع باقي الأطباق من المطبخ ولما رجعت لقت حماتها قاعدة مكانها في رأس السفرة وحسام بيحط قدامها طبق التورتة
نوال ابتسمت وقالت
أهو كده يا حبيبي الواحد يحس إنه في بيته
وبعدين بصت ناحية منى وقالت
منى ممكن تجيبيلي طبق من الأكل اللي فاضل وتحطيه في المطبخ؟ أنا وحسام عايزين نقعد لوحدنا شوية
منى وقفت مكانها وسألتها
يعني حضرتك عايزاني أتعشى في المطبخ؟
نوال ردت من غير أي إحراج
ما إنتي طول عمرك بتاكلي في المطبخ وإحنا مش بنضايقك
حسام ضحك ضحكة صغيرة وقال
يا منى متكبريش الموضوع دي أمي وضيفتي والليلة ليلة فرحة
منى بصتله فترة طويلة وبعدين قالت
تمام يا حسام زي ما تحب
دخلت المطبخ وبدأت تلم الأكل في العلب الكبيرة
حسام افتكر إنها هتجهز لنفسها طبق وتدخل تاكل بعيد عنهم لكنه اتفاجئ بيها وهي بتقفل علب الأكل وتحطها في شنطة كبيرة
دخل وراها وقال باستغراب
إنتي بتعملي إيه؟
منى ردت وهي بتقفل آخر علبة
باخد تعبي
حسام ضحك وقال
تعبك إيه بس؟ إنتي بتتكلمي كأنك عملتي إنجاز
منى رفعت عينيها وقالت
أنا اللي اشتريت الأكل من فلوسي وأنا اللي وقفت من الساعة ستة الصبح وأنا اللي طبخت وجهزت ونضفت البيت والليلة دي أنا اللي كنت مفروض أكون صاحبة البيت مش الخدامة اللي بتتطرد من السفرة
حسام قرب منها وقال بعصبية
إنتي عايزة تفضحينا قدام أمي؟
منى ردت بثبات
أنا مش هفضح حد يا حسام أنا بس مش هاكل في بيتي كأني واحدة غريبة
شالت الشنطة وخرجت من المطبخ
نوال قامت من مكانها وقالت بصوت عالي
إنتي رايحة فين بالأكل ده؟
منى وقفت عند باب الشقة وقالت
هروح عند أمي وأختي وهنتعشى سوا يمكن ألاقي هناك مكان ليا على السفرة
حسام جري وراها ومسك دراعها
إنتي مش هتخرجي من البيت بالشكل ده
منى بصت لإيده وقالت
سيب إيدي يا حسام
لكنه ما سابهاش
في اللحظة دي منى طلعت موبايلها وفتحت تسجيل الصوت اللي كانت شغلته من غير ما ياخد باله وهي في المطبخ
وخلته يسمع صوت أمه وهي بتقول
المهم يا حسام الورق يخلص قبل أول الشهر علشان منى ماتعرفش أي حاجة
حسام وشه اتغير فجأة وساب إيد مراته
منى بصتله وقالت
كنت فاكرة إنك بتأخذ من فلوسنا علشان تشتري لأمك هدية لكن واضح إن الموضوع أكبر من كده بكتير
نوال قامت من على الكرسي وهي مرتبكة وقالت
إنتي بتقولي إيه؟ وإيه التسجيل ده؟
منى ما ردتش وفتحت باب الشقة وخرجت
لكن قبل ما تنزل السلم سمعت حسام بيصرخ من جوه
يا ماما إنتي قولتي لها إيه؟!
وقتها عرفت إن قلقه مش من إنها سابت العزومة ولا من إنها أخدت الأكل
قلقه الحقيقي كان من إنها بدأت تكتشف السر اللي مخبيه عنها
والأغرب إنها لما وصلت عند أمها وفتحت صور الإيصالات اللي صورتها اكتشفت إن رقم التليفون المكتوب على ظهر إيصال الدهب تابع لمكتب محاماة
وفي رسالة قديمة على موبايل حسام لسه ما شافتهاش كانت هتكشف لها إن جوزها وأمه بيجهزوا لبيع حاجة تخصها من غير علمها…
منى وصلت بيت أمها في نفس الليلة وهي شايلة شنطة الأكل وموبايلها في إيدها ووشها باين عليه إنها مش بس زعلانة دي مصدومة من اللي اكتشفته
أمها فتحت الباب ولما شافتها بالشكل ده قالت بقلق
مالك يا بنتي؟ إيه اللي حصل؟ وإنتي جاية في الوقت ده ليه؟
منى حاولت تبتسم وقالت
مفيش يا ماما أنا بس حبيت أقضي الليلة معاكي بدل ما أقضيها وسط ناس مش شايفاني
أمها حضنتها وقالتلها
ادخلي يا حبيبتي واعتبري نفسك في بيتك
الكلمة دي خلت دموع منى تنزل لأول مرة من ساعة ما اكتشفت حقيقة حسام
قعدت مع أمها وأختها على السفرة وأكلوا من الأكل اللي هي تعبانه فيه طول اليوم وكانت كل شوية تبص للموبايل مستنية حسام يتصل
وفعلا بعد نص ساعة تليفونها رن
حسام
ردت من غير ما تقول ألو
صوته كان مليان عصبية
إنتي اتجننتي؟ إنتي عارفة عملتي إيه؟ أمي مش قادرة تهدى من ساعة ما مشيتي
منى ردت بهدوء
وأنا مالي؟ هي مش كانت عايزة تاكل لوحدها مع ابنها؟ أهو أنا سبتلكم البيت كله
حسام قال بعصبية أكبر
بطلي شغل العيال ده وارجعي البيت حالا إحنا لازم نتكلم
منى سألته
نتكلم في إيه؟ في الإسورة اللي اشتريتها من فلوسنا ولا في الورق اللي بتجهزه من ورايا؟
سكت حسام لحظات وبعدين قال
إنتي فهمتي الموضوع غلط
منى ضحكت بسخرية
الغريب إنكوا كل ما تتقفشوا في حاجة تقولوا فهمتي غلط




