
هي الأخرى شعرت نفس الشعور. يجب التحدث عن هذا الأمر الذي دائماً ما يحاولون تجنبه وعدم الاقتراب منه. منتهى الشفافية والوضوح حتى ينتهى هذا الصراع الذي بداخله. ومن يعلم ربما يقل هوسه تملكه المجنون هذا.
إذا لابد من لحظة مواجهة.
نظرت كعادتها بعمق في منتصف عينيه وقالت: عايز تقول إيه يا يونس… قول كل اللي في قلبك خلينا نخلص كلام في الموضوع ده ومانفتحوش تاني. لأني بصراحة زهقت.. أسأل اللي عايز تسأله وأنا هجاوب عليه بمنتهى الصراحة وبعدها قرر عايز تكمل معايا ولا… قاطعها بحدّة وهو يجذب كيانها العاري له قائلاً بشراسة: مفيش ولا.. انتي بأسمى وهتفضلي بأسمى حتى بعد ما أغيب… عارفة.. أنا واصل بيا الأمر لأني هوصى إن بعد غيابي ماتتجوزيش.
نظرت له بعين متسعة وقالت: بعد الشر عليك.. ماتقولش كده.
يونس بجدية: اللي عندى قولته يا شهد.. انتي شهد يونس العامرى.. وهتفضلي شهد يونس العامرى لآخر يوم في حياتك وياريت تسستمى أمورك وحياتك على كده.
أغمضت عينيها وفتحتهم بعد تنهيدة قائلة: عارفة… وراضيه.. بس خلينا في المهم.. أنت فتحت موضوع خلينا نتكلم فيه وننهيه عشان أنا تعبت.
أشاح بوجهه للجهة الأخرى صامتاً. فتحدثت هي قائلة: اتكلم يا يونس… قول اللي في قلبك عشان مش هنفتح الموضوع ده تاني.
نظر لها مجدداً وقال: شهد.. أنا بحبك أوى.. كل اللي بحس بيه ده من حبي ليكى.. حاسس باشتعال جوايا.. على فكرة أنا كنت بحب سعد جداً وأظن انتي اخدتى بالك من ده… أنا مش الراجل البشع اللي بقا كاره أخوه زي ما انتي فاكره… مش هكدب عليكى.. بصراحة أنا كمان كنت فاكر إن اللي بقا جوايا كره.. لكن أنا مش كده.. مش وحش كده.. اللي أنا فيه ده غيره.. وعلى فكرة غيرة الرجالة وحشة أوى وصعبة أووى.. حتى تصعب من غيرة الستات.. على الأقل الستات يقدروا يعبروا عنها ويتكلموا فحدتها بتقل طول ما هم بينفسوا عن اللي جواهم.
لكن احنا رجالة.. والغيرة دي بتاعت الحريم.. حاجة تعيب فينا وتقل مننا لو عبرنا أو بان علينا غيرتنا.
عشان كده كان باين إن غيرتي كره.. لكن أنا عمري ما أكره سعد.. ده ابني.. أنا اللي ربيته.. كنت بتابع معاه كل تفاصيل حياته.. أحلامه.. أنا اللي.
ابتلع غصة مريرة في حلقه وقال: أنا اللي جالى أول واحد يكلمني عنك.. وأنا اللي جيت وخطبتك ليه. وكنت فرحان.. فرحان جداً.. ابني كبر… وبقى عريس وبيتجوز.
ماكنتش أعرف إني بجوزه حبيبتي.. ماكنتش أعرف أني بشهد على عقد جوازه من اللي هتبقى حياتي كلها.. حجزتله سويت ملكى في الفندق بتاعي عشان يستفرد بمراته اللي هتبقى مراتي وكل حاجة ليا في الدنيا.
بحب جورى جداً.. دي بنت أخويا وحتة منه وعوضه في الدنيا. بس ساعات بفكر.. جبتو جورى إزاي.. قرب منك.. لمسك.. كنتى مبسوطة معاه.. كنتى ب…
أغمض عينيه بقوة وألم وهي صامتة تريده أن يبوح بكل ما يعتمر قلبه رغم ذهولها بكل هذا.
أكمل بمرارة قائلاً: اوعى تفتكرى إني حبيتك عشان شكلك حلو.. أنا عارف وانتي عارفة إنك فعلاً جميلة.
لكن لا.. أنا حبيتك من أول ما بدأت أركز معاكى من بعد ما بقيتى على ذمتى.. كنتى لسه بنقابك قدامى.. لاقيت فيكى حنية وحب واهتمام مش في حد. عشقت صوتك.. حركة إيدك.. ريحتك الخفيفة اللي بتحسسنى إننا في عز الربيع. بعدها شوفتك.. شوفتك خدودك.. سفايفك.. عينك.. شعرك.. كيانك.. وقعت.. لأ غرقت.. وهنا ابتدي العذاب… انتي بعدانى عنك… مش بتسيبى فرصة غير لما توصليلى وتوصلى للكل إنى مجرد زوج على ورق وإنك عايشة على حبك لسعد.. كل ده في نفس الوقت اللي بتعذب فيه طول النهار وحتى بالليل في. أحلامى مش سيبانى في حالى.
تعبت كتير على ما وصلتلك.. ماكنتش حابب أبداً أوصلك غصب ولا أفرد نفسي عليكى… مش أنا الراجل اللي يعمل كده.
شهد أنا مش بكره سعد.. لكن غيران… غيران منه جداً. انتي كنتى بتحبيه أوى.
صمت نهائياً بعدما أفرغ كل شحنته السلبية وارتاح بما كان يحويه قلبه.
نظرت شهد بعمق له وقالت: يونس.. بصلى… بص في عينى.
رفع نظره وصوبه داخل عينيها فقالت: يونس مش هنضحك على بعض… أنا كنت بحب سعد.
اشتعلت عينيه باشتعال غيرة فأخمدتها قائلة: لكن أنت أنا بعشقك… يونس أنا حبيت سعد وأنا لسه عيلة صغيرة.. حبيت حبه ليا وهو عرف يخلينى أحبه بعد الجواز بحنيته واحتواءه واهتمامه.. سننا ودماغنا كانت قريبة من بعض. وكان بيفهمنى من غير ما أتكلم. وده زود حبنا لبعض.
نظر لها بحزن كاد أن يسقط دمعه ففهمت عليه وابتسمت قائلة: لكن قولى يا يونس.. لما تحب حد أكبر منك بـ16 سنه.. لما تحب حد هو تفكير وانت تفكير.. هو من جيل وانت من جيل تانى خالص. حد مش فاهمك ولا فاهم دماغك فيها إيه. لا وكمان جوازك منه بدأ بداية صعبة. لأ دي صعبة جداً. مش بس كده. هو مش ليك لوحدك وغصب عنك وعنه في حد بيشاركه فيك….ومخلف من حد غيرك…….فارض عليك كمية تحكمات رهيبة… بس بعد كل ده ورغم كل ده تحبه… رغم أنك كنت متضايق منه جداً.. رغم انك كنت ناوى تندمه على كل لحظة وجع عاشها بسببه… تلاقى نفسك مش بتعمل كده… لا ده انت عايزه مبسوط وسعيد…. شخص مفيش بينك وبينه أي تكافئ خالص…عارف ساعات بقعد مع نفسى كده وبقعد افكر اقول طب أنا بحبه ليه… إيه اللي شددنى ليه… طبعاً أنا عارفه ومتأكدة إنك فيك مميزات كتيرة جداً لكن لما ما تبقاش لاقى السبب الأقوى… لما يبقى الإجابة هو إنى مش عارفة… يبقى هو ده العشق.
اقتربت منه وألصقت وجنتها بوجنته وقالت: فرق كبيييير بين الحب والعشق وأنا عشقتك يا يونس.
أغمض عينيه يتنهد براحة كبيرة.. لقد أراحته وأثلجت قلبه حقاً.
حديثها كله صحيح وهو يعلمه. لا يوجد بينهم أي نقطة مشتركة ولكن الله قد زرع عشق كل منهم بقلب الآخر. هي تعشقه لذاته. يونس الرجل. وليس يونس العامرى المعروف الثرى.
جذبها من ذراعها ومددها على قدميه فأصبحت في أحضانه ومال عليها يهمس لها ببطء ونعومة. وضعت كفها الصغير على عنقه تمررها عليه مرسلة موجات عالية تلهب حواسه أكثر وأخرى تضعها بشعره فتجذبه إليها ولشفتيها أكثر وأكثر.
كانت لمسة محمومة وناعمة في نفس الوقت. جاءت بعدما أفضى كل منهم بما يحمله بقلبه بكل شفافية وصراحة. يهمس لها بحب وراحة على أقل من مهلة وقد ارتاح قلبه. لن يقارن نفسه بأخيه ثانية. إن هي أحبت أخيه ولم تنكر وهذا شيء جيد فهي ليست ناكرة للجميل أو تجارية الموجه واعترفت بما قد كان. لكنها الآن تعشقه. والعشق يتخطى الحب بكثير لذا بدءاً من الآن لا خوف لا غيرة أو ضيق على أخيه الشهيد.
استمرت لمساتهم لوقت لا يعلمون كم مدته فهي لمسة حب وعشق وليست رغبة إطلاقاً.
وقف عز أمام ماكينة صنع القهوة في غرفة نومه لا يرى أمامه زوجته المصون.
عز بصوت واضح يحدث نفسه كالمجنون: لأ مش هدور عليها أكيد بتستحمى… الست دي بتستحمى أكتر ما بتنام.
ترك الماكينة تعمل وذهب إلى المرحاض ودق الباب قائلاً: يا مااااهى… النضافه حلوه مفيش كلام.. بس مش كده يعني.
ماهى بهدوء واسترخاء من الداخل: شششششش… بس ماتزعجنيش… اووووف.. أنت مش متخيل.. جيرانا اللي بعدنا بفيلتين لسه ماشيين من عندى.. أوووف مش طايقه نفسى.
هز رأسه بيأس منها وذهب يلتقط كوب القهوة بعدما انتهت الماكينة من إعداده.




