
كامل: لا لا يا بني أنت فاهم غلط خالص، احنا مش عايزينها تمشى بالعكس.
نظر له باستغراب قائلاً: سيادة اللوا حضرتك سيد من يفهم في الأصول، وعارف إنه مش هينفع.
نظر كامل لابنه كي يتحدث هو بالنيابة عن نفسه، ففهم يونس وحمحم قائلاً: أستاذ كريم، أنا عايز أتجوز شهد.
كريم بعين متسعة وذهول: تتجوزها إزاي.
تبادلوا النظرات ثم قال مستنكراً: أتجوزها على سنة الله ورسوله بعد عدتها ما تخلص.
كريم: يونس بيه، ما تزعلش مني، بس أنت كبير عليها أووي.
شحب وجه يونس من هذه الحقيقة المرة.
كامل: يا كريم يونس ابني رجل أعمال ناجح، وهو هيصونها ويراعي بنت أخوه، أنا بعتبر شهد بنتي وهي لسه صغيرة ومن حقها تتجوز تاني، ويونس يعتبر حل معادلة صعبة إنها تتجوز وتبقى في حما راجل لأنها لسه صغيرة وكمان نضمن إنها تتجوز رجل يبقى رحيم ببنتنا ويراعيها لأنها في الأصل بنت أخوه.
تنهد كريم بعمق فهو اقتنع إلى حد ما بوجهة نظرهم ثم استأذنهم للصعود لأخته وسيفاتحها بالأمر.
بعدما خرج قال يونس: شوفت يا حاج، مش قولتلك فرق السن كبير وواضح، ما كانش لازم نفكر في كدا أبداً.
كامل: يونس يا بني اللي بنعمله ده هو الصح، الراجل قادر يحتوي مراته ويقرب منها وقادر يخليها تبعد عنه وما تبقاش طايقاه، هو هايفاتحها وأنا عارف شهد عاقلة وإن شاء الله هتفضل مصلحة بنتها على أي حاجة تانية.
يونس بضيق: يعني هتوافق عليا عشان جورى بس.
كامل باستغراب: أمال أنت متوقع إيه يا يونس، أنت دايماً كنت أخو سعد، أخو جوزها، عايزها توافق عليك لشخصك، طب إزاي ده.
نظر له بغضب ثم صعد لشقته دون التفوه بحرف آخر وهو صدقاً لا يعلم لما يغضبه إنها ستوافق فقط من أجل ابنتها.
في الأعلى بشقة شهد كانت أختها ملك تقطع الصالة ذهاباً وإياباً بغضب وهي تقول: بنت الجزمه، متصلة تشمت فيكي، دي ما كلفتش نفسها تسأل عليكي، ماشي، ماشي، ماهي الغيرة تعمل أكتر من كده.
شهد باستغراب: غيرة.
ملك بغضب: أيوه غيرة.
شهد: غيرة إيه بس، أنتي مش بتشوفي هي بتلبس إيه ولا بتصرف على نفسها ومكياجها ومظهرها إزاي.
ملك: هو أنتي يا بنتي مش بتبصي لنفسك في المرايا، ده أنا أختك وبغير منك، يا نهار أسود، ده أنتي معمولك 34 محضر تحرش بسبب جمالك وفتنتك، ده احنا نقبناكي عشان خايفين عليكي، مش مصدقاكي بجد، بطلي طيبة وتواضع بقا، أما مروه دي وديني لأوريها، ماشي ماشي ما بقاش إلا الزرقا دي كمان.
ثواني ودق جرس الباب فذهبت لتفتح وجدته كريم ابتسم لها قائلاً: أهلاً أنتي لسه هنا.
ملك: أمال أسيب أختي الصغيرة لوحدها.




