
احتدت عيون مروه وهي تستمع لحديث ريهام ورأت ابتسامة على وجه تلك الخادمه فصرخت بغضب: امشي اطلعي يونس بيه بسرعه، اتأخر على شغله.
تحركت الخادمه بسرعة وهي تتمنى الخلاص من الحاجة والفقر وتلك السيدة منعدمة الإنسانية.
في غرفة شهد
يستيقظ يونس على صوت طرقات الباب فقال بصوت جهوري: مين.
هنيه من خلف الباب: أنا هنيه يا يونس بيه، مروه هانم بعتاني أصحي حضرتك عشان اتأخرت.
يونس: طيب خلاص روحي أنتي.
نظر بجواره وجد مهلكة قلبه وعقله تنام بعمق شديد وأثر الإرهاق والألم بادٍ على وجهها الجميل، لعن نفسه تحت أنفاسه لأنه تعامل بشدة معها.
ابتسم بقوة وهو يمرر عينيه على سائر وجودها مع وجهها، يضع يده عليها وهو لا يصدق نفسه أنها تنام بجواره بهذا الوضع.
ضمها له وهو ينظر هنا وهناك بحب يتحوذها في أحضانه بين ذراعيه وكأن هناك شخص أو شيء سيخطفها منه.
وكأنه يخبئ شيئاً ثميناً عن أعين الناس، رغم أنهم في حجرة نوم خاصة ولا يوجد أحد معهم، ولكنه الحب والشغف.
في أحد المواقع العسكرية يجلس مدحت وهو يتأكله الغضب، فنظراً للظروف العسكرية الطارئة لم يستطع أخذ إجازة منذ ثلاثة أشهر مما اضطره للابتعاد عن محبوبة قلبه.
رفع هاتفه على أذنه وانتظر الرد: الو، أيوه يا ماجد، مفيش أخبار.
ماجد بحنق: بقولك إيه أنا ولا طايق نفسى ولا طايقك.
مدحت بسخرية: في إيه مالك بس يا بطة.
ماجد: وليك عين تتريق، بس أنا اللي غلطان وحيوان عشان سمعت كلام واحد غير مناسب زيك.
مدحت: لا لا، لم لسانك يا بن خالتي، وإلا هقول لخالتي على الموضوع القديم اللي أنا مدارى عليك فيه بقالي سنة اهو، وبعدين هو أنا كنت طلبت منك إيه يعني، كل ما في الموضوع إنك هتقرب من رنا صاحبتها شويه عشان تعرفلي أخبارها ونعرف نخرج مع بعض، يعني بحجة إنها هي وصاحبتها وأنت وصاحبك، عشان ماتبقاش عزول يعني.
ماجد: يا اخي لم نفسك بقى، هو أنت فاكر كل البنات كده ولا إيه، سيبك من البنات الكسر اللي لما بيشوفوا صفحتك على الفيس ويعرفوا إنك ظابط يقوموا يترموا عليك، مش كل البنات من الفئة غير المناسبة دي، في بنات محترمة ومتربية كتير والبنتين دول كده.
مدحت: يا عم ماتتحمقش أوي كده، وبعدين أنا مش راميك أي رمية والسلام، ماهي صاحبتها جامده برضه.
ماجد بغضب: اتخرس بقا، أنت اتجننت إزاي تتكلم عنها كده.
مدحت: إييه ده، ده شكله السمك جه في الشبك اهو، هههههه صحيح تيجي تصيده يصيدك.
ماجد: مع السلامة يا مدحت.
وأغلق الهاتف في وجهه، بينما مدحت نظر للفراغ قائلاً بابتسامة: حلو أوي، خطوات قليله وأبقى قريب منك يا شهد، مش هسيب حد يخطفك منى تاني، كفاية سعد سبقني زمان، لأ والواد كان حريف وواعي خلاها كتب كتاب على طول من غير خطوبة، بس اهو راح ومش هخلى اللي اسمه يونس ده ياخدك منى، ماهو مش معقول هتقبليه بسنه ده.
ثواني وارتفع رنين هاتفه فنظر له وامتعض وجهه ورماه خلفه بعدما وضعه على وضع الصامت كي لا يزعجه رنين زوجته، وأغمض عينيه يتخيل شهد قريبة منه وتبتسم له.
استيقظت شهد من نومها بألم جسماني رهيب، وجدت يونس يكبلها من كل جزء منها، يكبل ذراعيها وساقيها بيديه وساقيه ويحبس وجودها وهو يضغط عليه بوجوده خوفاً من أن تهرب منه أو يكون حلماً جميلاً كأحلامه المتلهفة بها وينتهي.
نظرت له ولملامحه السمراء الرجولية وأمعنت النظر به.
اجتاحتها إحساسيس غريبة ومتضاربة.
هل سمحت لنفسها بالاقتراب من رجل غير سعد.
هذا الرجل الذي يكبلها بسائر وجوده هو يونس شقيق زوجها، ذلك الضخم الذي يغفو بجانبها بملابس النوم، كانت منك قريب لا تناديه إلا وتسبق اسمه بلقب، لا ترفع عينها به، تعتبره شقيقها الكبير.
وهو كان يعاملها بمنتهى الاحترام ولكن من بعيد نظراً لتحفظها الشديد من ناحيته بالخصوص.
من يصدق أن ذلك الرجل الذي كانت تنظر له بهذه الطريقة وبكل ما ذكرناه سيأتي عليها اليوم الذي تقضي معه ليلة محمومة كهذه في حلال الله وينام إلى جوارها بهذه الهيئة، وما هذا إلا حق من حقوقه.
من يصدق حقاً.
ولكن تعود وتهاجمها مشاعرها المتخبطة من جديد، فهي لا تنكر أنها شعرت بالراحة والانسجام بين ذراعيه رغم قوته وشدته، إلا أن هذه القوة وهذه الشدة لم تخلو أبداً من حبه الواضح لها.
لا تعلم لما لم ترفض أو لم تعارض رغم أن جزءاً بسيطاً من عقلها كان ما يزال بوعيه حاضراً، ولكنها وهي أمام كل هذا الحب رفعت الراية البيضاء، لم تستطيع رفض حبه وشغفه، لم تستطيع.
حاولت التملص من بين ذراعيه ولكن وهن وجودها جعلها تأن بخفوت أيقظه.
نظر لها وهو يبتسم بحب كبير، هيئتها الساحرة وهي هكذا أنعشت قلبه وروحه.
ابتسم لها قائلاً: صباح الخير يا روحي.
ابتسمت بنعومة وإرهاق قائلة: صباح النور.
اشفق عليها من الإرهاق البادي على وجهها ويعلم أنه هو السبب به فقال بأسف من جديد: اسف يا حبيبتي، كان غصب عني، ما قدرتش أمنع نفسي عنك، بحبك بطريقة صعبة أوي.
حن قلبها عليه أكثر وهو يتوسلها بحب هكذا، ونست أي شيء قد فعله وابتسمت قائلة: خلاص خلاص، حصل خير، بس يعني، هو ممكن بعد كده ماتبقاش شديد أوي تاني.
ابتسم باتساع وهو وعد بمواصلة حياة طبيعية بينهم كأي زوجين وقال بلهفة واضحة: أوعدك، أوعدك يا شهدى.
جذبت مسامعها الكلمة فقالت باستغراب: شهدك.
ابتسم بحب وتأكيد قائلاً: طبعاً شهدى، بتاعتى أنا لوحدي، من هنا ورايح بقا اسمك شهد يونس العامرى.
نظرت له ولم تجب، فمشاعرها المتخبطة عاودت مهاجمتها من جديد، ذكرى سعد زوجها الحنون، وهذا الزوج الذي يحتضنها وينام بجوارها مع حديثه الشغوف هذا.
حاولت تغيير مجرى الحديث فقالت: هي الساعة كام دلوقتي.
يونس: 3.
شهقت قائلة: 3 العصر.
أومأ لها بالإيجاب فقالت: يا نهار أبيض، جورى، إزاي أسيبها كل ده لوحدها.
اشتعلت عينيه بالغيرة، فبعدما كانت بأحضانه له فقط تتمسح به بنعومة جاءت ابنة سعد لتخطف انتباهها وتركيزها فقال بغيرة واضحة: جورى مع عمتها، وكمان هي كبرت ولازم تتعود تنام لوحدها.
شهد: لأ هي لسه صغيره، هتخاف، لازم تنام في حضني.
يونس بغيرة: طب وأنا.
نظرت له بتفاجئ، هل يقارن حاله بطفلتها.
شهد: يونس، أنا، قاطعها بقوة قائلاً: شهد جورى مابقتش صغيره وبعدين على فكرة مش سبب مقنع لأنها في البيت القديم كانت بتنام في أوضة لوحدها، إيه اللي اتغير هنا.
شهد بتلعثم: هنا بيت جديد عليها و.
يونس: احنا هنا في البيت من أكتر من 3 شهور، أكيد اتعودت خلاص بدليل إنها نامت امبارح مع ريهام.
شهد: يا يونس، قاطعها بغيرة: مش هنام غير في حضنك يا شهد، مش هحرم نفسي من إحساسي امبارح واللي عشته معاكي أبداً، لازم هعوض نفسي عن كل سنه ويوم وساعه ماكنتيش معايا فيها.
نظرت بذهول إلى الإصرار والقوة التي بعينيه وحديثه وقالت: طب اهدى طيب، يعني دي بنتي و.
يونس: مابقولش هبعدها عنك، دي من أهلي برضه، بس حضنك ليا، ليا لوحدي يا شهد، سامعه.
أشاحت بوجهها بعيداً عنه.
فزفر بغضب واقترب منها يتحسس بشر ظهرها العاري قائلاً: حبيبتي مش عايزك تزعلي مني.
شهد بغضب وهي تنظر الجهة الأخرى: مش عايزني أزعل إزاي وأنا شايفاك بدأتها من دلوقتي اهو، أولها مانيمش البنت جنبي، وياعالم بكره في إيه.
يونس بلهفة ليصلح هذه الفكرة الخاطئة: لأ لأ يا حبيبتي، جورى زي بنتى وهتتعامل أحسن معاملة وهعملها وديعة بمبلغ كبير جداً باسمها في البنك، مش هتتنقل لأي أوضة والسلام لأ، دي أحلى وأحسن أوضة في الفيلا كلها وكمان قريبة منك، أنا بس، أنا عايزك ليا، حضنك ليا، وكده ولا كده جورى كانت هتبدأ تنام لوحدها.
نظر لها يحاول قراءة أفكارها ولكن ملامحها لا تظهر شيئاً فابتسم قائلاً: يالا بقى ننزل نتغدى معاهم.
استدارت له بخجل قائلة: لأ.
يونس باستغراب: لأ ليه ده أنتي مافطرتيش، وكمان مش كنتي عايزه تشوفي جورى، يالا ننزل نطمن عليها عشان تعرفي بس إني مش عايش جو جوز الأم الشرير وكده يعني.
قالت بخجل وتلعثم: لا، لا، أصل، ماهو أنا مكسوفه منهم بعد ما عرفوا من ريهام أكيد إننا كنا مع بعض، مش عايزه حد يشوفني.
ابتسم هو وقال: أنا بقا عكسك تماماً، عايز أنزل بيكي وأكد للكل إنك بقيتي ملكى وبتاعتى، وكمان إيه مش عايزه حد يشوفني عشان كنت معايا دي، أنا جوزك على سنة الله ورسوله وليا حق فيكي، احنا مش بنعمل حاجة غلط.
شهد برجاء: عشان خاطري يا يونس بلاش، خلينا نتغدى هنا، عشان خاطري.
ابتسم لها باذعان قائلاً: خاطرك غالى أوي عندى، حاضر مش هننزل على الغدا، بس هنتعشى معاهم أنا عايز الكل يعرف اللي بينا وإنك بقيتي مراتى رسمى.
شهد: لازم يعني.
يونس بإصرار: لازم جداً، هيفرق أوي معايا.
شهد: حاضر يا يونس.
اقترب منها بخبث وهو يتفحص هيئتها اللافتة وقال: حاضر يا إيه.
شهد بدلال: يا يونس.
أغمض عينيه متأوهاً وقال: أحلى يونس بتتقالى منك أنتي.




