
الحاجة نادية فضلت واقفة مكانها ووشها بقى أصفر كأن الدم انسحب منه مرة واحدة وبصت لمحامي كريم اللي كان بيقلب في الورق بسرعة وبيحاول يلاقي أي مخرج من المصيبة اللي وقعت عليهم
القاضية سلوى عبدالعزيز خبطت بالقلم على المكتب وقالت بحزم
اتفضلي يا مدام نادية اقعدي مكانك ومحدش يتكلم غير لما ياخد إذن
حماتي قعدت وهي بتترعش وفضلت تبصلي بنظرات كلها غضب وتهديد وكأنها مش مستوعبة إني أنا الست اللي كانت طول عمرها بتعتبرها ضعيفة ومش هتعرف تاخد حقها
داليا محاميتي طلبت من القاضية تسمح لها تكمل عرض المستندات فالقاضية أشارت لها بالموافقة
داليا طلعت صورة عقد بيع الشقة اللي في التجمع الخامس وحطتها قدام القاضية وقالت
يا فندم الشقة دي اتشرت من خلال تحويلات مالية خارجة من حساب موكلتي لكن المفاجأة إن الشقة ما اتسجلتش باسم السيد كريم ولا باسم السيدة نادية زي ما كان متوقع لكن اتسجلت باسم شركة اسمها النور للاستثمار العقاري
القاضية سألتها
وإيه علاقة الشركة دي بالمدعى عليه؟
داليا ردت وهي بتطلع مستند تاني
الشركة دي اتأسست قبل شراء الشقة بشهرين فقط والمدير المسؤول عنها هو السيد كريم المنشاوي أما صاحبة الحصة الأكبر فيها فهي السيدة نادية المنشاوي
الحاجة نادية اتحركت في كرسيها وقالت بعصبية
الكلام ده كدب وأنا ماليش دعوة بأي شركة ولا أعرف عنها حاجة
داليا بصتلها بهدوء وقالت
غريب جدا لأن حضرتك ماضية بنفسك على عقد تأسيس الشركة وعلى كل المستندات البنكية الخاصة بيها
محامي كريم وقف بسرعة وقال
يا فندم إحنا بنعترض على طريقة عرض المستندات دي وعايزين نتأكد من صحتها
القاضية ردت عليه
من حقك تطلب فحص المستندات لكن الاعتراض مش معناه إننا نتجاهل وجود أدلة تستدعي التحقيق
وبعدين بصت لي وسألتني
مدام مريم هل عندك علم بالتحويلات المالية دي؟
قمت من مكاني وقلت بصوت ثابت رغم إن قلبي كان بيدق بسرعة
أيوه يا فندم أنا اللي اكتشفتها بالصدفة لما كنت براجع حساباتي بعد ما بدأت أشك إن جوزي بيصرف فلوسي على حياته الخاصة
القاضية سألتني
وهل سبق ووافقتي على تمويل الشركة دي أو شراء العقار؟
هزيت راسي وقلت
لأ يا فندم ولا عمري وافقت ولا مضيت على أي ورقة تخص الشركة دي وكل اللي كنت أعرفه إن كريم بيستخدم جزء من فلوسي عشان ينقذ شركته القديمة
داليا بصت للقاضية وقالت
وده مش كل شيء يا فندم لأن عندنا تقرير مبدئي من خبير خطوط بيوضح وجود اختلافات جوهرية بين توقيع موكلتي الموجود في المستندات وتوقيعها الحقيقي
في اللحظة دي محامي كريم بص للحاجة نادية وبعدين بص للأرض وكأنه بدأ يفهم إن الموضوع أكبر من مجرد قضية طلاق
القاضية طلبت الاطلاع على التقرير وقررت ضم المستندات لملف الدعوى وإحالة التوقيعات للفحص المختص واتخاذ الإجراءات القانونية اللازمة لحماية الحقوق المالية لحين انتهاء التحقيق
لكن قبل ما الجلسة تخلص داليا طلبت الإذن بتقديم مستند أخير
طلعت ظرف بني قديم وحطته قدام القاضية وقالت
يا فندم المستند ده هو السبب الحقيقي وراء استعجال السيد كريم في إنهاء الزواج وغيابه النهارده عن الجلسة
القاضية فتحت الظرف وبدأت تقرأ الورق
كل ما كانت بتقلب صفحة كان وشها بيتغير أكتر
أما الحاجة نادية فكانت بتراقبها وهي بتضغط على إيديها لدرجة إن صوابعها ابيضت من شدة التوتر
القاضية رفعت عينيها وسألت داليا
هل السيدة مريم على علم بمحتوى المستند ده؟
داليا بصت لي وقالت
موكلتي عرفت جزء من الحقيقة فقط لكن لسه ما تعرفش كل التفاصيل
اتخضيت وبصيت لها وقلت
يعني إيه يا داليا؟ إنتي مخبية عني حاجة؟
داليا قربت مني وهمست
استحملي يا مريم لأن اللي هتسمعيه دلوقتي ممكن يغير كل حاجة كنتي مصدقاها عن جوازك
في اللحظة دي القاضية طلبت من الحاجب يتأكد إن محدش يغادر القاعة قبل ما يتم إثبات بيانات الموجودين المرتبطين بالمستند
وبعدين وجهت كلامها للحاجة نادية
مدام نادية هل حضرتك تعرفي إن الشقة محل النزاع اتسجلت بناء على عقد فيه إقرار بوجود شراكة مالية قديمة بينك وبين المدعية؟
حماتي شهقت وقالت
شراكة إيه؟ دي فلوس ابني وهو حر فيها!
القاضية ردت بهدوء
إحنا مش بنتكلم عن فلوس ابنك دلوقتي إحنا بنتكلم عن مستندات بتقول إن فيه أموال خرجت من حساب المدعية واتنقلت لحسابات مرتبطة بالشركة اللي حضرتك شريكة فيها
وبعدين رفعت ورقة تانية وقالت
لكن السؤال الأهم هو ليه فيه عقد تاني بيحمل توقيع السيدة مريم وبيتنازل عن حقها في العقار لصالح شخص تالت؟
حسيت إن الأرض بتلف بيا
بصيت لداليا وقلت بصوت مخنوق
أنا ما مضيتش على أي تنازل
داليا مسكت إيدي وقالت
عارفة يا مريم وعشان كده طلبنا فحص التوقيع
القاضية كملت قراءة المستند وبعدين قالت
الشخص المستفيد من التنازل ده مش السيد كريم المنشاوي ولا السيدة نادية المنشاوي
رفعت عينيها ناحية آخر القاعة وقالت
الاسم الموجود في العقد هو اسم السيدة نادين فؤاد
عشيقة جوزي!
حسيت إن نفسي اتسحب مني
يعني كريم ما اكتفاش إنه ياخد فلوسي ويشتري لها شقة لكنه كمان حاول ينقل ملكيتها باسمها بتوقيع مزور؟
لكن الصدمة الحقيقية كانت لسه جاية
لأن داليا فتحت الظرف مرة تانية وطلعت شهادة ميلاد قديمة وصورة عقد زواج وقالت للقاضية
يا فندم إحنا محتاجين نثبت كمان صلة القرابة بين بعض الأطراف المذكورة في المستند الأخير
القاضية بصت في الورقة وبعدين رفعت عينيها ناحية حماتي وقالت
مدام نادية هل تعرفي إن السيدة نادين فؤاد مش مجرد امرأة على علاقة بنجل حضرتك؟
حماتي غطت وشها بإيديها وبدأت تعيط لأول مرة من ساعة ما دخلت المحكمة
أما أنا فبصيت لداليا وقلبي بيدق بعنف وسألتها
هي نادين مين بالظبط؟
داليا قربت مني وقالت بصوت واطي
نادين مش غريبة عن عيلة كريم زي ما انتي فاكرة… وورا وجودها في حياته سر قديم حاولوا يدفنوه من سنين
وفي اللحظة اللي كنت مستنية فيها داليا تكمل كلامها اتفتح باب القاعة بعنف ودخل كريم وهو لسه ماسك موبايله ووشه مليان غضب
بص للقاضية وبعدين بص لأمه ولما شاف الورقة اللي في إيدها وقف مكانه واتغيرت ملامحه تماما
وقال بصوت مرتعش
مين اللي طلع الورق ده؟ وإزاي وصل لكم؟
لكن القاضية ردت عليه بسؤال واحد خلاه يسكت تماماً
إنت يا أستاذ كريم كنت تعرف إن الست اللي هتخلف منك ممكن تكون أختك من الأب؟
كريم فضل واقف مكانه كأنه اتسمر في الأرض وموبايله وقع من إيده من غير ما يحس وبص للقاضية وهو مش قادر يستوعب السؤال اللي سمعه
قال بصوت متقطع
أختي؟ حضرتك بتقولي إيه؟ نادين أختي إزاي؟
القاضية سلوى عبدالعزيز بصت له وقالت بحزم
إحنا قدامنا مستندات بتشير إن والدك كان متزوج من والدة السيدة نادين بعقد زواج عرفي قديم وإن فيه إقرار نسب مرفق بالأوراق محتاج يتم التحقق منه رسمياً
كريم لف ناحية أمه وهو بيصرخ
إنتي عارفة الكلام ده من إمتى يا أمي؟
الحاجة نادية كانت بتعيط ومش قادرة ترفع عينيها فيه
قالت بصوت ضعيف
كنت عارفة إن أبوك كان ليه حكاية قديمة قبل ما يتجوزني لكن ما كنتش أعرف إن نادين هي البنت دي غير من فترة قريبة
كريم قرب منها وقال
من فترة قريبة يعني إيه؟ وليه ما قولتيليش؟ وليه سيبتيني أكمل معاها؟
نادية مسحت دموعها وقالت
لأنك كنت خلاص اتعلقت بيها ولما عرفت إنها حامل خفت أقولك الحقيقة وأخسرك
ضحكت ضحكة قصيرة من وسط دموعي وقلت
خوفتي تخسري ابنك ولا خوفتي تخسري الفلوس اللي كنتوا بتاخدوها مني؟
كريم بصلي بعصبية وقال
إنتي مالكيش دعوة بالموضوع ده يا مريم
وقتها وقفت وبصيت له لأول مرة من غير خوف وقلت
أنا ماليش دعوة؟ ده أنا اللي فلوسي اتسرقت وأنا اللي اتخنت وأنا اللي اتعمل عليا عقد تنازل مزور عشان شقة اتشرت من تعبي وفلوسي وبعدين تيجي تقولي ماليش دعوة؟
داليا وقفت جنبي وطلعت مستند جديد وقالت




