
نظرت له وهي تبتسم بحب، بينما على الجانب الآخر بجوار يونس كانت مروه تشتعل غضباً وغيره.
نظرت هي ليونس فتحدث لأبيه قائلاً: سيادة اللوا كنت عايزة أتكلم معاك في موضوع.
والده: اتفضل يا حبيبي.
يونس وهو ينظر لمروه التي تنتظر حديثه بفارغ الصبر: الفيلا اللي أنا اشتريتها في الكمبوند الجديد جهزت جداً وكنت حابب ننقل فيها.
الأب بابتسامة: طبعاً يا حبيبي زي ما تحب، ووقت ما تحب تنقل انقل.
يونس: لا يا بابا، أنا أقصد ننقل كلنا.
احتدت ملامح مروه بغضب فهي ترفض ما يقوله بشدة.
سعد باعتراض: يونس مش هينفع دي فيلتك، ملكك وحقك، نعيش فيها على أساس إيه، طبعاً مش هينفع، لو بابا وماما حابين يروحوا يعيشوا معاك مش هقدر أعترض لكن أنا لأ مش هينفع أعيش في مكان مش ملكي.
زفرت مروه بارتياح بينما أكمل يونس بإصرار: لأ طبعاً، أنا عايز نعيش كلنا في مكان واحد.
سعد: يونس أنا مش هعيش في مكان مش ملكي، أنا أملك الشقة اللي أنا عايش فيها بس لأنها ببساطة نصيبي، لكن فيلتك حلال عليك أنت.
يونس موجهاً حديثه لشهد: طيب كلميه أنتي يا شهد.
تفاجئت شهد من حديثه الموجه إليها، وكذلك أظلمت عين مروه بغضب وغيره لمجرد أنه تحدث إليها ونطق اسمها، فهي تغار من شهد خصوصاً.
تحدثت شهد بنبرة صوتها الجميلة والهادئة قائلة: مش هينفع فعلاً يا دكتور، مش هنقدر نعيش في مكان مش ملكنا ومش دافعين نصيبنا في تمنه، أنتوا الله يهنيكوا بيها يارب وتكون قدم سعد عليكوا، وابقوا تعالوا زورونا كل أسبوع.
نظر لها بعمق وقد أعجبته قناعتها قائلاً: وأنا اللي قولت إنك هتأثري عليه شوية تقومي تقولي كده.
مروه قاطعه الحديث الذي طال جداً من وجهه نظرها: خلاص يا يونس يا حبيبي، سيبهم براحتهم، ننقل احنا.
الأب: انقل أنت يا حبيبي ما أنت مش شاريها عشان تفضل قافلها كده، روح يا بني واتمتع، لكن أنت عارف أمك مش هترضى تسيب جورى أبداً، وكمان مالك.
تحدث مالك بثقة تليق به جداً وهو يضع الطعام في فم جورى: سيبهم يا جدو، أنا سايبهم يتكلموا براحتهم، لكن اللي أنا عايزه هيحصل، ومافيش حد هيبعد جورى عني.
صدم الجميع من حديثه بينما هو يتحدث بثقة ولا ينظر لأي شخص منهم إلا جورى التي تستقبل الطعام منه بابتسامة وهو يعبث بشعرها.
زفرت مروه بغضب وهي تنظر لشهد التي تتناول طعامها بهدوء ولم تغار أو يهتز لها شعرة كونها تملك فيلا هي وزوجها وأموال طائلة بينما سعد لا يملك غير راتبه الزهيد جداً بالنسبة لها.
في المساء في شقة سعد كانت شهد قد أعدت كوبين من النسكافيه وذهبت حيث يجلس سعد أمام التلفاز وضعتهم وفتح هو لها أحضانه لتتوسطها فأردفت قائلة: تفتكر يا دودى دكتور يونس هينقل فعلاً.
سعد: مش عارف، ممكن آه وممكن لأ.
شهد: لا ما تقولش كدا، إن شاء الله ينقلوا، يارب ينقلوا.
سعد: ههههههه، إيه يا بنتي، ليه كده.
شهد: عشان أنزل تحت من غير نقاب ما بقاش مضطرة أنزل بالنقاب لأحسن أقابله تحت ولا حاجة.
سعد: شوشو حبيبتي، سواء نقلوا أو ما نقلوش أنا قولتلك قبل كده لو عايزة تنزلي من غير النقاب عادي أنتي اللي مصرة تنزلي بيه.
شهد: أعمل إيه أبله مروه كل ما تصادف وتشوفني من غيره تفضل تزعق وتعلّي صوتها وتقول إن أنا عايزة جوزها يشوفني.
اعتدل سعد من مجلسه بحدّة قائلاً: وأنتي إزاي تسكتي لها وإزاي ما قولتيليش على حاجة زي دي قبل كده.
شهد بتنهيدة حارة: بصراحة سكت مش عايزة مشاكل، هلبسوا وهو موجود وخلاص.
سعد: لا طبعاً أنا بقى مش هسكت، أنا مسافر الفجر وأول ما أرجع هتكلم معاها وهبهدلها، أنا ملبسك النقاب مش عشان تدين وكده أنا مكتفي بالحجاب وده اللي أمرنا بيه الإسلام، لكن أنا وأهلك خليناكي تنتقبي عشان جمالك لأنه فتنة وممكن يضرك، بس مش معنى كده إنك تفضلي لابساه جوا البيت كمان، وياريتها بتتكلم بأسلوب كويس، لأ دي بتتهمك أبشع التهم، مش كفاية حاكمة عليكي تقوليلوا يا دكتور طول الوقت.
شهد بترجٍ تجنباً للمشاكل: سعد، عشان خاطري، ما تندمنيش إني قولتلك، مش عايزة مشاكل.
سعد بصرامة: أنتي أصلاً غلطانة إنك ما قولتيش من زمان، إزاي تسمحي لحد يهينك ويتهمك كده، أنا ضهرك وحمايتك ولو كنتي أنتي غلبانة ومسالمة يبقى أنا مش لازم أسكت وهجبلك حقك يعني هجيبه.
شهد: بس يا سعد.
سعد: شششششش، مافيش بس، هي جورى لسه ما طلعتيش من عند ماما.
شهد: ههههههه لأ ماما ومالك بيتخانقوا عليها تحت.
سعد: طب تعالى بقا عشان هتوحشيني، أخذها وغاص بها في عالمهم الخاص.
في شقة يونس كانت مروه تشتعل غضباً وهي تتحدث مع يونس قائلة: كان لازم يعني تشكرها على الأكل، وتسلم إيدك يا شهد، ليه يعني كل ده.
يونس بتأفف: دي تالت مرة تتكلمي في الموضوع، خلاص يا بنتي ما كانتش كلمة شيليها من دماغك بقا.
مروه: أنا مش حطاها في دماغي أصلاً الفلاحة دي، وبعدين أنا عايزة أفهم احنا ليه مش هننقل الفيلا بتاعتنا، يعني إيه جوزي مليونير وعايشة في شقة عادية.
يونس: عادية، بقى بذمتك دي شقة عادية، حرام عليكي بجد دي سعرها مش تقل من 2 مليون، ده غير لبسك وعربيتك اللي بتغيريها كل سنة، والخدامة، ولبسك اللي كله براندات، عايزة إيه تاني، ده أنا هاري نفسي شغل وسفر مش بكمل أسبوع من غير ما أسافر فيه عشان أوسع شغلي أكتر وأجيب فلوس أكتر ليكي، بس إني أنقل وأبعد عن أخويا صعب، أنا مراعي ربنا فيكي جداً بس مش هبعد عن أخويا، ده أنا اللي مربيه وروحي فيه، وياريت كفاية خناق عشان عندي طيارة الصبح.
تركها وغادر إلى غرفة نومه بينما هي تنظر لأثره بغضب وحقد.
في الصباح كان سعد يهم بفتح الباب للمغادرة فالتفت إلى شهد قائلاً: شوشو خلي بالك من نفسك ومن جورى وكليتك يا شهد أوكي.
شهد بحب: حاضر يا حبيبي، وبعدين لسه الكلية فاضل عليها أربع شهور، وأنت اللي هتوديني بنفسك.
ابتسم بحب ثم ودعها وأغلق الباب خلفه، توقف المصعد في الطابق الثالث وفتح فتهللت أسارير يونس وهو يسلم على سعد قائلاً: صباح الخير، رايح شغلك.
سعد: آه، وأنت مسافر ولا إيه.
يونس: آه، رايح الصين وهرجع كمان يومين.
فتح باب المصعد فقال سعد قبل أن يذهب: طيب ابقى خلي بالك من جورى وشهد، أوكي، يالا سلام، ثم ذهب سريعاً فنظر يونس لأثره باستغراب وصعد سيارته سريعاً وذهب باتجاه المطار.
بعد أربعة أيام كان يونس قد عاد من سفره ويجلس حالياً مع والده، ثواني وشاهدوا على التلفاز خبر واقعة من جماعة مسلحة على موقع في منطقة عسكرية، بهت وجه الجميع وهم يشاهدون اسم وصورة سعد من بين المفقودين، صرخت شهد ثم فقدت الوعي وسقطت أرضاً.
الثاني
مصيبة وصدمة وقعت على هذا البيت وسط انهيار تام من الجميع، الأب لا يكاد يصدق أنه ودّع ابنه بيديه وهو على قيد الحياة بدلاً من أن يحمله على عاتقه إلى مثواه الأخير ويقف كي يأخذ واجب العزاء فيه، بدلاً من كل ذلك شاء القدر وفعل هو ذلك لابنه، والأم فهي في حالة سيئة للغاية، فقدان الابن غالٍ خاصة سعد فهو روحها ومنبع الحنان والاهتمام بشخصيته المرحة التي لم تؤثر عليها طبيعة عمله، فهو من كان يهتم بطعامها ومواعيد دوائها، يتابع مع زوجته بالهاتف جميع مواعيد أمه ولم يشغله عمله، فهو كان نعم الابن الحنون المراعي.
أما يونس فهو الأكثر صدمة على الإطلاق، فقد غاب سعد، رحل وتركه أخيه الأصغر لا بل ابنه الكبير الذي رباه، مهما تتطرق الشخص بخياله لن يصل لمدى مكانة سعد عند يونس، إنه قطعة من روحه، يشعر بالانهيار الداخلي ولكن عليه التماسك والتظاهر بالقوة فوالديه لا ينقصهم رؤية انهيار ابنهم الأكبر والسند الوحيد الآن، ولكن ليشهد الله أن قطعة من روحه قد تمزقت الآن، فشعوره ناحية سعد هو نفس شعوره ناحية مالك.
كذلك ريهام لم تنقطع عن البكاء والشهقات التي تدمي القلب، فسعد يعتبر توأمها وتوأم روحها، أقرب شخص لديها وصديقها وكاتم أسرارها، هو أول من أخبرته بحبها لابن عمها وساعدها حتى تمت الخطبة وعقد القران أيضاً، هو الأخ الذي لن يعوض.
أما هي، هي زوجته التي تنساب دموعها فقط لا تنطق ولا تصرخ، فبعد أن استفاقت من إغمائها عند سماعها الخبر لا تفعل شيئاً سوى أنها تحتضن طفلتها من سعد بين أحضانها، تشعر معها بمرارة اليتم التي ستتذوقها ابنتها، فهي تعلم جيداً الشعور باليتم كيف يكون، فقد غاب والداها وهي صغيرة أيضاً، ولكن وجود أخيها الأكبر الذي كان مثل الأب وأكثر قد عوضها، وبعدها التقت بسعد وتزوجته وهي صغيرة لم تكمل الثامنة عشر وقد أغدقها بحنانه واهتمامه، آه يا سعد يا نعم الزوج والرفيق والسند، فليرحمك الله وليصبرني على بعدك ويعينني على تربية ابنتنا، لكنها حقاً تشعر بالاختناق ولا تستطيع تحمل فكرة أنه رحل كوالديها، تشعر بالعجز والقهر حقاً.
لكن على الجانب الآخر من كل هؤلاء الأشخاص المصدومين تجلس هي وقلبها يرقص طرباً، تشعر بالتشفى والفرحة، ولولا كلام الناس لقامت ورقصت الآن في فناء البيت وأمام من جاءوا للعزاء، وأخيراً ابتسم لها الحظ وستتخلص من شهد للأبد، كابوسها المزعج وواقعها المرير، فهي على الرغم من أناقتها واهتمامها بمظهرها وشياكتها التي تنفق عليهم الكثير، لكنها لم تشعر بالغيرة يوماً إلا منها، هي التي بدون مجهود بدون اهتمام أو إنفاق أو الذهاب لصالونات التجميل تكون فاتنة، لا بل أكثر من فاتنة، فإذا كانت هي امرأة مثلها ولا تستطيع إزاحة عينها من عليها إذا رأتها من دون نقاب، فما بالك بالرجال، كانت دوماً تحمد الله كثيراً أنها منتقبة، فماذا كانت ستفعل إن خرجت على زوجها هكذا، ستموت فيها حقاً، ولكن لا بأس مروه فقد ابتسم الحظ أخيراً وكلها أيام قليلة وتُطرد نهائياً من حياتكم، وهاقد رحل عنها زوجها الحنون المراعي الذي كان دائماً يشعرها بالغيرة والنقص وهي ترى اهتمامه ومراعاته لها وكأنها قطعة زجاج، تجلس بجانبها غادة أختها تعلم ما يدور بذهن أختها ويتبادلون النظرات التي تنطق بالسعادة والتشفى.
بعد مرور شهرين وقد خفت المصيبة قليلاً، فالغياب هو المصيبة الوحيدة التي تبدأ كبيرة وتصغر مع الوقت والتعود، عكس أي مصيبة أخرى تأتي صغيرة وتصغر مع الوقت.
كانت شهد تلزم شقتها حيث جاءت أختها الكبرى ملك لتعيش معها هذه الأيام كي تهتم بها، وأخوها الأكبر كريم يأتي كل يومين للاطمئنان عليهم وتلبية احتياجاتهم.
في شقة كامل، والد سعد ويونس، كان الخلاف المعتاد يومياً بين الجدة ومالك، وبالطبع لم يكن الخلاف إلا على جورى، نفذ صبر مالك من هذه الجدة التي تريد أخذ صغيرته منه، فصاح بقوة قائلاً بشراسة: تيتااااااااا، اوعى إيدك عنها، ثم قال محدثاً الجميع بنفس الشراسة: لو شفت حد تاني قرب ناحية جورى مش هيحصل طيب، ثم نظر إليها قائلاً بحدّة: وأنتي يا هانم، إيه اللي أنتي لبسااااااه دده، ها، اطلعي قدامي يالا عشان تغيري، ومن هنا ورايح أنا اللي هنقيلك لبسك كله، مفهوم.
نظر له الجميع برعب وصدمة وراقبوه وهو يمسك يدها بحنان ويخرج من الباب صاعداً لأعلى بشموخ وقوة، نظر يونس لأثره ثم نظر لوالديه بصدمة ثم انفجروا ضاحكين، فقال يونس بتعجب: أنا بجد هتجنن، مش عارف الولد ده طالع لمين كده، ولا أنا ولا سعد الله يرحمه حد فينا كده، ولا أنت يا بابا، حتى أهل أمه ماحدش فيهم كده.
تنهد الأب على سيرة ابنه المفقود قائلاً: الله يرحمه، ويجعله من المفقودين، ادمعت عين يونس ووالدته متمتمين: آمين.
عزيزه: طب وبعدين.
نظر يونس باستغراب قائلاً: وبعدين إيه.




