منوعات

الاعراج حكايات زهره

الشاب صاحب العكاز اللي بيشوي الدرة عند بيتي قال لخطيبي تتحداني في مسابقة الجري واللي يفوز يتجوز خطيبتك؟ وقتها خطيبي كان هيغمى عليه من الضحك، بس يوم المسابقة أنا اللي رجليا مكانتش شيلاني من الصدمة، مبقتش عارفة أتصرف، وخطيبي كان هيفقد أعصابه وطلب الشرطة فورًا!

اسمي عزة، كنت مخطوبة لشاب اسمه شريف وبحبه ومتعلقة بيه جدًا وكنت فاكرة إن علاقتنا مثالية.

شريف كان بطل الجمهورية في الجري، جسم رياضي، وعضلات، وكنت فخورة بيه قدام الناس كلها. دايمًا بياخد جوايز وكؤوس، وكل صحباتي كانوا بيحسدوني عليه وعلى ثقته في نفسه.

في يوم، كنا راجعين من برا، وكان بيوصلني قدام العمارة بعربيته. وأنا نازلة، لفت نظري يافطة معلقة على الحيطة برا مكتوب عليها إن أهالي الشارع عاملين مسابقة جري بعد يومين، واللي حابب يتقدم يسجل اسمه.

قلت بحماس وأنا بضحك: الله! اتقدم يا شريف. محدش هيفوز عليك أصلًا، الجايزة دي عشانك!

بص لليافطة بسخرية وقال: أديكي قولتي يا حياتي، محدش هيفوز غيري.. فإيه لازمتها المسابقة بقى؟ دي مش مستوايا أبدًا، وهظلم المشتركين معايا، محدش فيهم يقدر يتحداني أصلًا.

ولسه هندخل العمارة، سمعنا صوت تخين وواثق من نفسه جاي من الجنب بيقول بصوت عالي: أنا اتحداك.. وهفوز عليك كمان!

التفتنا إحنا الاتنين، وهنا كانت الصدمة اللي مكنتش على البال. ده كان أدهم! الشاب صاحب العكاز اللي بيشوي درة تحت بيتنا على طول. أدهم ده شاب على قد حاله، فقير جدًا، لبسه مبهدل، وكل اللي حيلته عربية درة قديمة بيقف عليها من الصبح لليل. وطول عمره بيمشي على عكاز؛ أصله تعرض لظرف زمان ورجله تأثرت جدًا ومبقاش يقف عليها من غير العكاز ده.

شريف أول ما شافه ضحك كثيرًا.. ضحك ضحك جنوني مبقاش عارف يسكت منه.

صعب عليا أدهم أوي، حسيت إنها مش لطيفة خالص، فقلت بضيق: يا شريف عيب كده، بلاش طريقتك دي.

بصلي وقال وهو لسه بيضحك: أنا آسف يا روحي، بس انتي مش سامعاه؟ الشاب صاحب العكاز ده جاي ينافسني أنا في الجري؟ سيبك منه يلا خليني اطلعك فوق، شكل الشمس اللي واقف فيها دي ضربت دماغه.

ولسه هيمشي، أدهم اتكلم بثقة غريبة بصوت عالي قدام الناس: أنت خايف ولا إيه؟ أنا بقولك إني هكسبك، واللي يفوز فينا… يتجوز خطيبتك! قولت إيه ولا أنت فعلًا خايف؟

عقلي طار من الصدمة، بصيت لأدهم بزعيق وأنا مندهشة: أنت بتقول إيه؟ أنت اتجننت؟ إيه قلة الأدب دي؟

بس المفاجأة الكبرى إن شريف اتعصب، وقال بغضب وصوت عالي: موافق!

برقت على الآخر، وبصيت لشريف بصدمة وقلتله وأنا ماسكة في دراعه: أنت بتقول إيه يا شريف؟ أنت اتجننت زيه ولا إيه؟!

بصلي وعيونه كلها تحدي وغرور وقال: انتي خايفة من إيه يا روحي؟ أنا هوصل خط النهاية قبل ما يمسك عكازه حتى! أنا كنت هشفق عليه، بس طالما اتجرأ واتحداني قدام الناس بالمنظر ده، يبقى يستاهل تتمسح بكرامته الأرض عشان يتعلم ميتكلمش مع الكبار تاني.

أنا مكنتش موافقة على العته دي نهائي، حسيت إن الموضوع بقى مهين وسخيف، وهما الاتنين بقوا يبصوا لبعض بتحدي شرس وكل واحد مصر على رأيه. قلت بغضب وتأفف: أنا مش جايزة تتسابقوا عليها! طلعوني بره الهبل ده. وطلبت منه يسيبني وطلعت بيتي زعلانة ومقفولة من طريقتهم الاتنين.

بس شريف مهتمش بزعلي خالص، وراح سجل في المسابقة بسرعة، وقال لأدهم: اشوفك هناك أنت وعكازك. وطلع يراضيني بكلمتين. قعدت أحايل فيه وأقوله إن ده غلط وعقلنا المفروض يكون أكبر من كده، بس قال إنه قلل منه قدام الناس كلها، وإنه لو اتراجع هيقولوا عليه جبان وخايف، واتحايل عليّا أروح أقف أشجعه.

وأمي بقى.. اللي كملت عليا؛ قالت لشريف: لو واثق كده، أنا موافقة بس بشرط إن جايزة المسابقة تكون هدية منك لبنتي!

شريف وافق فورًا. وأنا.. وافقت بضيق وقهر منه ومن أمي اللي مش مهتمين لزعلي ولا لكرامتي، وروحت يوم المسابقة وأنا مخنوقة.

يوم المسابقة، الشارع كان مقلوب، وكل الناس متجمعة حوالين خط الجري. أول ما وصل أدهم مكنش لابس أي لبس رياضي لأنه أصلًا مش معاه فلوس لحاجة زي دي، كان ماشي على عكازه وبيعارج بالعافية ولابس لبسه القديم المبهدل.

وهنا شريف وقف وسط صحابه بيشاور عليه ويضحك بصوت عالي وبسخرية واضحة للكل.

أنا وقفت بخنقة مستنية شريف يكسب واليوم ده يخلص ونروح.. بس… اللي حصل بعدها بدقايق ميخطرش على بال بشر!

لحظة واحدة حولت كل الضحك ده لسكوت مرعب؛ خلتني وقفت زي التمثال ورجليّا مكانتش شايلاني من كتر الصدمة.. وشريف نفسه اتنفض من مكانه، وفقد أعصابه تمامًا لدرجة إنه جري طلب الشرطة فورًا!

أول ما الحكم ضرب صفارة البداية، شريف انطلق بسرعة رهيبة، وكان واضح إنه متحمس يثبت لكل الناس إنه أقوى وأسرع واحد فيهم. أما أدهم، ففضل واقف مكانه ثواني، مستند على عكازه، والناس بدأت تضحك وتهمس لبعضها.

واحد من الواقفين قال بسخرية: يا عيني عليك يا أدهم، أنت هتجري ولا هتتفرج على شريف وهو بيكسب؟

أدهم مردش، واكتفى إنه بص قدامه بابتسامة غريبة، وبعدها رفع إيده للحكم وطلب منه يستنى لحظة.

وفجأة، أدهم فك العكاز اللي كان مستند عليه، وسلّمه لواحد من المنظمين، ووقف على رجليه الاتنين!

أنا حسيت إن نفسي اتسحب مني، وفضلت باصة عليه مش مصدقة اللي شايفاه.

إزاي؟! ده أنا عمري ما شوفته واقف من غير العكاز، حتى وهو بيبيع الدرة كان بيقعد على كرسي صغير عشان ميتعبش رجله.

لكن المفاجأة إن أدهم بدأ يتحرك بخطوات ثابتة، وبعدها انطلق يجري!

مش جري عادي، ده كان بيجري بسرعة خلت الناس كلها تفتح بقها من الدهشة، والأغرب إنه كان بيقرب من شريف بسرعة كبيرة.

شريف كان في نص الطريق تقريبًا، ولما سمع صوت الناس وهي بتصرخ وراه، لف وشه، وأول ما شاف أدهم بيجري وراه، وشه اتقلب.

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى