
فاروق، أنا مش مرتاحة، أنا حاسة إن ماما ممكن تكون بدأت تتحسن، ومحتاجة نكشف عليها تاني.
وشه اتغير فجأة، وبصلي بحدة:
إنتِ بتلمحي لإيه يا سما؟ إنتِ تقصدي إن أمي بتمثل علينا؟
اتوترت وقلت بسرعة:
لا طبعًا، أنا مش قصدي كده، أنا بس بقول يمكن حالتها اتحسنت ومحتاجة تقييم جديد.
ساب موبايله، ومسك إيدي وقال بصوت هادي:
سما، إنتِ بقالك شهور مش بتنامي كويس، وتعبانة نفسيًا وجسديًا. أنا شايف إنك بقيتي بتتخيلي حاجات مش موجودة. إنتِ محتاجة ترتاحي، ويمكن محتاجة تتكلمي مع دكتور نفسي.
كلامه وجعني… وبدأت فعلًا أشك في نفسي.
يمكن أنا مرهقة؟ يمكن الضغط والتعب خلوني أفهم الحاجات غلط؟
لكن قبل ما أنام الليلة دي، سمعت صوت ضحك جاي من أوضة فردوس. مكنش ضحك واحدة تعبانة أو موجوعة…
كانت بتضحك براحتها، وبعدها سمعتها بتقول جملة خلت رجلي تتسمّر قدام باب أوضتها:
متقلقش يا فاروق، طول ما هي مصدقة إني مش قادرة أمشي، إحنا لسه قدامنا وقت.
وسمعت صوت جوزي بيرد عليها:
وطي صوتك يا ماما، مش عايزينها تبدأ تسأل وتشك في حاجة.
في اللحظة دي حسيت إن الأرض بتتهد من تحتي.
إيه اللي بيحصل بالظبط؟
وليه جوزي وأمه بيخبّوا عني الحقيقة؟
وإيه السر اللي مخليهم مصرّين إني أفضل خدامة ليها طول الوقت؟
وهل فعلًا فردوس عاجزة، ولا كل اللي شفته خلال السنتين دول كان مجرد تمثيلية؟
حكايات_مني_السيد.
سيبت باب الأوضة ورجعت على أوضتي بآلية غريبة، زي ما أكون ماشية في حلم أو كابوس ومش عارفة أصحى منه. رجلي مكانتش شايلاني، وقلبي كان بيدق بسرعة جنونية لدرجة إن صوته كان مسموع في هدوء الشقة.
قعدت على حرف السرير وأنا حاطة إيدي على بؤي عشان أمنع نفسي من العياط بصوت عالٍ. الجملة كانت بتتعاد في ودني زي الصدى: طول ما هي مصدقة إني مش قادرة أمشي، إحنا لسه قدامنا وقت.
يعني إيه؟ يعني السنتين اللي ضاعوا من عمري… شغلي اللي سيبته… الترقية اللي حلمت بيها… وحلم الأمومة اللي تأجل… كل ده كان علشان تمثيلية؟
في الليلة دي، مجمّعتش ساعتين نوم على بعض. كل ما أغمض عيني، أفتكر كل لحظة تنازلت فيها، كل مرة فاروق كان يبصلي فيها بنظرة انكسار ويقولي إنتِ أصيلة يا سما، وكل مرة فردوس كانت تعيط وتقولي سامحيني يا بنتي أنا تقلت عليكي.
الصبح طلع، وأنا لسه صاحية. قمت من السرير ووشي باهت في المراية، بس جواه شعلة غضب وهدوء غريب… هدوء الست اللي اكتشفت إنها اتخدعت وقررت متعملش أي رد فعل غير لما تفهم كل حاجة بالظبط.
دخلت المطبخ أجهز الفطار وزي كل يوم، يرن الجرس الصغير من أوضة فردوس. رن… رن… رن.
الصوت اللي كان بيخليني أفرز أدرينالين وأجري بسرعة، المرة دي خلى أعصابي تغلي. أخدت نفس عميق، وفتحت باب أوضتها بابتسامة متصنعة:
صباح الخير يا ماما… أصلحلك المخدات؟
فردوس كانت قاعدة على السرير، ووشها واخد نفس نظرة الانكسار والضعف اللي حافظاها. يسعد صباحك يا بنتي… تعباكي معايا والله. رجلي وجعاني أوي النهاردة يا سما، حاسة برطوبة شديدة فيها.
كنت واقفة بصلها، ولأول مرة ألاحظ التفاصيل الصغيرة اللي غابت عني سنتين… بشرتها المشدودة، صحتها العامة، وحتى حركة إيدها وهي بتغطي رجليها بالبطانية بسرعة أول ما دخلت!
ألف سلامة عليكي يا حبيبتي… هجيبلك الدوا وأعملك الشاي الدافئ.
خرجت وأنا مصممة إني لازم أدور وراهم. فاروق نزل شغله الساعة تسعة، وبمجرد ما الباب اتفقل وراه، بدأت خطتي.
أول حاجة عملتها، افتكرت الأوراق والتقارير الطبية اللي فاروق جابها معاه من إسكندرية أول ما الواقعة حصلت. كان دايمًا شايل كل أوراق فردوس في درج مكتبه في الصالة، وقافله بالمفتاح.
دورت على المفتاح لحد ما لقيته استبن في درج المطبخ. فتحت المكتب بكتام، وطلعت الشنطة البلاستيك اللي فيها الإشاعات والتقارير. كنت محتفظة برقم دكتور عظام كبير كان صديق لوالدي الله يرحمه. صورت كل التقارير والإشاعات على الموبايل وبعتهتاله على الواتساب، وكتبتله:
دكتور، الأوراق دي تخص حالة قريبة مني… هل الأزمة دي تسبب عجز كلي أو تمنع الحركة تمامًا؟
وبينما أنا مستنية رده، كملت تدوير في المكتب. ووسط الورق، لقيت كراسة صغيرة متدارية تحت حافظة المستندات. فتحتها… وكانت الصدمة الثانية.
الكراسة كانت كراسة حسابات خط فاروق! مكتوب فيها مبالغ مالية كبيرة، وتحتها عناوين وتواريخ:
100 ألف جنيه مقدم إيجار كافيه بالمهندسين يناير 2024.
50 ألف جنيه تجهيزات وأثاث مارس 2024.
أرباح شهرية متوقعة 40 ألف جنيه.
قلبي اتنفض… فاروق اللي كان بيتحجج إننا معندناش 30 ألف جنيه شهريًا نجيب بيهم ممرضة لأمه، فاروق اللي كان بيشتكي من مصاريف دكاترة التخصيب والحمل… معاه فلوس يفتح بيها كافيه في المهندسين؟! ومنين؟ هو مرتبه في شركة النقل يغطّي كل ده؟
وفجأة الموبايل رن بصوت واطي… كان دكتور العظام. رديت بسرعة بصوت مجهد:
أيوة يا دكتور؟
جه صوته الهادي من الناحية التانية:
أهلاً يا سما يا بنتي… أنا شفت الإشاعات اللي بعتيها. التقارير دي قديمة طبعًا، بس اللي باين فيها إن كان فيه شرخ بسيط في فقرة قطنية وتورم حولين الحبل الشوكي. ده يحتاج راحة وعلاج طبيعي شهرين أو تلاتة بالكثير، بس مطلقًا ما يعملش عجز دائم ولا يمنع المشي بعد كل الفترة دي! الحالة دي لو عملت علاج طبيعي منتظم ترجع تقف على رجلها عادي جداً. إلا لو فيه تقارير أحدث أنا مش شايفها؟
أنا جسمي كله كان بيترعش. لا يا دكتور… دي كل التقارير. شكراً جداً لحضرتك.
قفلت السكة وأنا حاسة إن الأوكسجين بيقل في الشقة. كل حاجة بقت واضحة زي الشمس. فردوس مش عاجزة ولا حاجة! كانت أزمة ضخّموها عمداً وتضخيماً عشان يستغلوني.
بس السؤال اللي كان بياكل في عقلي ليه؟ ليه فاروق وأمه يعيشوني في التمثيلية دي سنتين كاملين؟ ليه يخلوني أسيب شغلي ومهنتي ومستقبلي؟ وليه كان بيقولها إحنا لسه قدامنا وقت؟ وقت لإيه بالظبط؟!
رجعت قفلت المكتب زي ما كان، وحطيت المفتاح مكانه. وقررت إن المواجهة دلوقتي هتفسد كل حاجة. لازم أعرف السر الكامل، وأعرف الفلوس دي جاية منين، وإيه المخطط اللي بيتدبرلي في بيتي… بيت جدتي الحاجة زينب!
وهنا افتكرت جملة جدتي: اللي بيحبك بجد عمره ما يطلب منك تضيعي نفسك علشانه. أنا ضيعت نفسي عشان وهم، بس وحياة كل نقطة عرق وتعب في السنتين دول، مش هسيب حقي.
في عصر اليوم ده، دخلت أوضة فردوس ومعايا الشاي. كانت قاعدة بتتفرج على التلفزيون، ومأنتخة تماماً. أول ما دخلت، اتعدلت بسرعة وعملت نفسها مش قادرة تتحرك وتأوهت بصوت واطي:
آآه… ضهري بيموتني يا سما.
ابتسمت ابتسامة صفرا وقلتلها:




