منوعات

يوسف

قال ياسين لخالد بهدوء: خليك هنا وأنا كلها ربع ساعة وأكلمك.

أومأ خالد ودخل ياسين للداخل ورأى آخر ما كان يتوقعه. قال بصدمة: زهرة!!

زهرة انتفضت بخوف: ياسين!!

ارتبكت زهرة وهي بتقوم عشان تمشي. ناظرتها زمرد باستغراب: في إيه يا زهرة؟ مالك؟ انت تعرفي ياسين؟

زهرة بتوتر: أه أعرفه. معلش أنا مضطرة أمشي.

ياسين باستغراب: في إيه يا زهرة؟ مالك؟

زهرة بتوتر: مفيش حاجة.

ياسين باستغراب أكبر: أومال هتمشي ليه؟ في حاجة حصلت؟

زهرة بارتباك ورعب: يعني هو…

ياسين بهدوء: أنا عارف انت بتفكري في إيه، وأحب أقولك اطمني، أنا مستحيل أقول ليوسف على مكانك. أنا قطعت علاقتي بيه من زمان ومستحيل أقول لحد على مكانك. ثم أكمل وهو يشعر أنه عندما نطق بهذه الكلمات كان يدق قلبه برفض لكلامه: انتي أختي يا زهرة، اطمني وثقي فيا.

ابتسمت زهرة براحة وأنه فهمها دون أن تتحدث. ثم نظرت لزمرد بمعنى أن تصدق كلامه أم لا، فردت زمرد وهي تقول بجدية: ياسين ده مش ابن خالتي وبس، ده زي اخويا بالظبط، وأضمنهولك برقبتي.

تنهدت زهرة عندما سمعت كلمات زمرد وقد زادت ثقتها به لأنها تعرفه منذ زواجها من يوسف، فكانت تجمعهم صداقة قوية، لكنه كان يفضل باسم عنه، إلا أن باسم كان تصدر منه تصرفات سيئة اتجاهها، أما عن ياسين فهو كان في غاية الاحترام معاها ولم ترى منه تصرف سيئ، وكان دائماً ينظر للأرض ويغض بصره عندما يراها، فهو خلوق وذو سمعة طيبة. وزاد احترام زهرة وتقديرها له عندما علمت أنه ابن خالة زمرد.

جلست زهرة. نظر لها ياسين وهو يقول لها باهتمام: عاملة إيه يا زهرة؟

زهرة بهدوء: الحمد لله.

ياسين: سمعت انك نقلتي هنا إسكندرية؟

زهرة: أه.

ياسين بمرح: طيب وإسكندرية أحلى بقي ولا القاهرة؟

زهرة بسرعة: لا، الإسكندرية طبعاً.

ياسين باستغراب: اشمعنا بقي!!!

زهرة وهي تتنهد بحزن: القاهرة كانت أيامي فيها وحشة ومش عايزة أفتكرها. أما في إسكندرية ذكرياتي فيها كتير، اتعرفت على أطيب وأجمل أخت. قالتها وهي بتحضن زمرد اللي عينيها دمعت بتأثر. ثم أكملت: وخرجت من وحدتي والعزلة اللي بابا كان عاملها عليا، وبقيت بعرف أتكلم مع الناس بدون خوف، ومش زي الأول، وبقيت عايشة بحريتي بدون ما أكون مقيدة أو متأذية نفسياً من حد ياذيني.

ياسين بجدية: على فكرة، أحسن قرار خدتيه إنك بعدتي عن المكان اللي بيأذيكي وبدأتي حياة جديدة مع نفسك بشخصية جديدة. خطوة حلوة جداً. بس إيه اللي خلاك تأخدي القرار ده فجأة كده!!

زهرة بقوة: حسيت إنه كفاية ضعف وذل لحد كده، ولازم أكون أقوى وأعتمد على نفسي. أديت لنفسي حجمها، وإنها تستاهل تنبسط وتستاهل إنها تحب وتتحب، تستاهل كل حاجة حلوة في الدنيا. وإنه مينفعش أضيع دقيقة من عمري بعد كده على علاقة أنا اللي ببذل كل مجهودي فيها عشان تستمر بدون مقابل ولا مساعدة من الطرف الثاني. مهما كنت بتحبه، هيجيلك وقت وهمل وتزهق، وحبك اللي تم استنزافه ده هيتحول لكره من غير ما تحس، فجأة كده!!

ياسين: وليه مخدتيش القرار ده من بدري؟

زهرة بحزن: كنت خايفة. أبويا طول عمره حابسني في البيت، مكنتش بتعامل مع حد غير أبويا ويوسف ومرات عمي وبس، فكنت خايفة من اللحظة اللي هبدأ أتعامل فيها مع ناس تانية. بس الحمد لله أنا سافرت واكتشفت إن إسكندرية وحياتي هنا أحلى بكتير من حياتي وسط يوسف وأهلي اللي عمري ما حسيت معاهم براحة وحرية قد اللي أنا حساها دلوقتي.

كان ياسين بيسمع كلامها باهتمام لحد ما جت سيرة يوسف، ضغط على إيده بضيق ميعرفش سببها، وهو حاسس أنه مضايق انها جابت سيرة راجل تاني غيره، ومش قادر يفسر أو يفهم إحساسه ده.

قال ياسين بعد كلامه معاها بابتسامة: طيب في حد دلوقتي شايف إنه غلط في حقك وعايز يصلح غلطه؟

ممكن كانت زهرة هترفض لكن قاطعها ياسين بهدوء: هو مكنش يقصد الكلام اللي هو قاله. والله هو قال كلامه ده أثر عصبيته في الشغل وندم بعدها. هو هيجي وهيعتذر. قبلتي الاعتذار تمام؟

“مش قبلاه خلاص، ده حقك ومحدش يجيرك على حاجة” تمام؟ أومأت زهرة بتفهم بينما زمرد تتابع الحوار الدائر مع زهرة وياسين منذ بدايته وعلي وجهها ابتسامة كبيرة، لأنها بدت تشعر أن بينهما انجذاب وإعجاب من ياسين ناحيتها لم يقدر على إخفاؤه.

ياسين وهو ينظر لزمرد: زمرد، نادي لخالد من برا عشان نسيت موبايلي في العربية.

زمرد بخبث: هو انت لسه واحدة بالك اني قاعدة؟ ما أنا كنت من خمس دقائق شجرة الليمون اللي بينكوا.

ياسين بإحراج حاول إخفاؤه: يلا يا زمرد انجزي.

زمرد بخبث أكبر وهي تقصد كلامها: ماشي، بتمشيني عشان يفضالك الجو. الله يسهلوا يا عم.

ابتسمت زهرة بخجل على كلامها، أما ياسين فكان يشعر أن دقات قلبه تكاد تسمعها عندما رأى ابتسامتها تلك التي أذهقت بروحه.

عند يوسف كان لسه قاعد بيفكر في مكان زهرة بضيق وجنون، وهو عايز يعرف هي راحت فين. هو عارف ومتأكد إنها لما ترجعله هيعرف يمشيها على مزاجه تاني ويخليها تديله ورثها وتوافق إنهم يرجعوا الشقة تاني وتنكر أي حاجة حصلت بينهم، ويرجع حد تاني يرضي غروره ويحسسه بقيمة نفسه. انتفض واقفاً فجأة وهو بيقول بجنون وصوت عالي: ازاي تاه عني مكانها؟ أخيراً افتكرته. ثم أكمل وهو يردف بنبرة مقززة ونرجسية: هترجعيلي تاني يا زهرة زي الكلبة تحت رجلي، وهرجع تاني لعزي وفلوسي، وهنتقم منكوا كلكوا، ودا وعد مني!!

أما عند ياسين وزهرة كانوا قاعدين مستنيين خالد وزمرد. دخلت زمرد هو وخالد اللي كان متوتر اوي من زهرة وقال: ازيك يا زهرة؟

زهرة باقتضاب: الحمد لله.

خالد وهو بيفكر، ايديه الاتنين في بعض بتوتر وهو بيفكر في حجة يقولها عن اللي قاله واللي عمله: أنا المرة اللي فاتت كلمتك بطريقة مش كويسة وقلت كلام مكنش ينفع أقوله، بس والله غصب عني. كان يومها عندي مشكلة كبيرة اوي في الشغل وكنت متعصب ومش داري أنا بقول ايه ولا بعمل ايه. متزعليش مني!!

زهرة قالت بهدوء، هي عمرها ما هتقدر تعتبره زي الأول ولا تصفي له، بس قررت إنها تسامحه وخلاص. قالت بهدوء: خلاص يا أستاذ خالد، محصلش حاجة.

ياسين بمرح: طالما اتصالحتوا، تعالوا بقي نروح نقعد عند خالتي عشان وحشاني اوي وعايز أسلم عليها.

زمرد بخبث: وأنا بقول كده بردو، وهو على الأقل تعرف إيه اللي بيحصل من وراها وتشوف العروسة.

كان خالد بيبصلهم باستفهام وعدم فهم، وزهرة كانت مش فاهمة حاجة بس حاسة إنها في الموضوع وياسين بيزغرلها عشان تسكت، وهو ملاحظ زهرة اللي وشها قلب ألوان.

قال ياسين وهو بيلطف الجو: يلا بينا بقي ولا ايه؟

زمرد وهي تضحك بخبث: ليك روقه يا ابن خالتي، توه توه كمان شويه.

خالد باستغراب وعدم فهم: هو في ايه؟ أنا مش فاهم حاجة.

زمرد بضحك: مش مهم تفهم، أنا هبقي أفهمك بعدين. ثم أكملت بعد أن لاحظت نظرات ياسين الحادة المصوبة ناحيتها: يلا بقي عشان منتأخرش.

قام خالد وزهرة وهي بتقول بإحراج: طيب همشي أنا بقي وهبقي أكلمك يا زمرد بليل.

ياسين بحدة: رايحة فين؟

زهرة باستغراب: رايحة البيت عادي.

زمرد بتذكر: أه صحيح، أنا افتكرت اني زعلانه من الاستاذ ده. قالت كلماتها وهي تشير على خالد ثم أكملت: ومش هرجع البيت تاني. يلا يا زوزو، رجلي على رجلك ونروح سوا.

ياسين بحدة: إيه الهبل اللي انتوا بتقولوه ده؟ يلا يا زمرد على بيت والدتك، وانت يلا يا زهرة تعالي اركبي عشان نمشي.

زهرة بإحراج: أنا مش هعرف أروح معاكوا. لو سمحت أنا هروح لوحدي.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى