الراجل اللي كان ماسك الصورة قربها من أحمد وقاله بصوت هادي لكنه مليان
واضح إن مراتك مش بس هتخسر بيتها دي كمان ممكن تدخلنا كلنا في مصيبة لو عرفت مين اللي واقف ورا التمويل ده
أحمد بصله بتوتر وقال
إنت مش قولت إن كل حاجة متأمنة وإن منى مش هتعرف توصل لحاجة؟
الراجل ابتسم وقال
أنا قولتلك إننا هنحاول نخلص قبل ما ترجع لكن واضح إنك مش فاهم إنت بتلعب مع مين
في اللحظة دي عرفت إن الموضوع مش مجرد خطة من أحمد وعيلته للاستيلاء على بيتي لكن فيه شبكة أكبر وفلوس اختفت من شركة شريف ومحدش عايز يقول راحت فين
حماتي عواطف خبطت بإيديها على الترابيزة وقالت بعصبية
إحنا مش ناقصين تهويل خلصونا من حوار منى ده الأول وبعدها كل واحد ياخد نصيبه
شريف رد عليها
إنتي فاكرة الموضوع سهل؟ الفلوس اللي اتسحبت من الشركة مش فلوسي لوحدي دي فلوس مستثمرين ولو الموضوع اتكشف هنتسجن كلنا
أحمد قرب منه وقال
ما إحنا اتفقنا إننا هنحط كل حاجة باسم منى ونثبت إنها هي اللي وافقت على التمويل وخدت الفلوس لنفسها
الراجل الغريب ضحك وقال
وده اللي أنا مستنيه بالظبط
اتجمدت مكاني
يعني إيه مستنيه؟
قبل ما أستوعب سمعت صوت موبايلي بيهتز في إيدي
كانت المحامية بتاعتي نجلاء بتتصل بيا
قفلت الصوت بسرعة وبعتلها رسالة كتبت فيها
أنا في البيت وأحمد وعيلته بيخططوا يزوروا توقيعي ويرهنوا البيت من غير علمي ومعايا تسجيل لكل الكلام محتاجة أشوفك فورًا
ردت عليا في ثواني
ممنوع تواجهيهم وممنوع تخرجي من مكانك قبل ما تبعتيلي التسجيل ولو تقدري صوري الأوراق من غير ما يحسوا
بصيت من فتحة الباب ولقيت الراجل الغريب بيطلع ورقة من الملف وبيحطها قدام أحمد
أحمد مسك الورقة وقال
دي كده كل المستندات؟
الراجل رد
تقريبًا لكن فيه حاجة واحدة ناقصة وهي صورة أصلية من عقد ملكية البيت
حماتي قالت بسرعة
العقد عند منى في خزنتها وأنا عارفة مكان المفتاح
قلبي وقع في رجلي
هي كانت عارفة مكان الخزنة كمان؟
داليا سألتها
وإنتي هتجيبي المفتاح إزاي؟
عواطف ابتسمت وقالت
أنا مش محتاجة مفتاح أنا عندي نسخة من مفتاح أوضة المكتب من وقت ما كنا بننضف البيت
في اللحظة دي فهمت إن دخولهم البيت النهارده ماكانش صدفة وإن كل واحد فيهم كان مجهز دوره من زمان
لكن اللي ماكانوش يعرفوه إن جدي كان موصيني قبل وفاته بحاجة مهمة جدًا
أي ورقة تخص ملكية البيت أو أي مستند قانوني كنت بحفظ منه نسخة في مكان تاني بعيد عن البيت
وفجأة سمعت صوت أحمد بيقول
طب خلونا نخلص النهارده قبل ما السواق يتصل ويقول إنها وصلت المطار
شريف رد عليه
اطمن أنا كلمت السواق وقلتله إن الرحلة اتلغت
اتسعت عيني من الصدمة
يعني حتى السواق كان متفق معاهم؟
مديت إيدي لموبايلي عشان أبعت لنجلاء التسجيل لكن قبل ما أضغط إرسال سمعت خطوات بتطلع السلم
حد كان جاي ناحيتي
قفلت الشاشة بسرعة ودخلت أوضة المكتب وقفلت الباب ورايا بهدوء
لكن بعد ثواني سمعت صوت حماتي من بره
منى؟ إنتي هنا يا حبيبتي؟
قلبي كان هيقف
وبعدها سمعت صوت المفتاح بيلف في الباب
حاولت أفتح موبايلي وأبعت التسجيل لكن الشبكة كانت ضعيفة والرسالة فضلت معلقة
وفجأة الباب اتفتح
دخلت عواطف وهي مبتسمة ابتسامة غريبة وقالت
إيه ده؟ إنتي لسه هنا؟ مش المفروض تكوني في طريقك للمطار؟
بصيتلها وحاولت أتماسك وقلت
الرحلة اتأجلت شوية ونسيت ورق مهم
بصت ناحية المكتب وبعدين ناحية الخزنة وقالت
طب ما تيجي أشوفلك الورق اللي ناقصك
وقبل ما أرد عليها دخل أحمد وراه الراجل الغريب
أحمد وقف مكانه أول ما شافني وقال بصوت متلخبط
منى! إنتي رجعتي إمتى؟
ابتسمت وبصيت في عينيه وقلت
رجعت قبل ما أكتشف إن جوزي ناوي يسرق بيته بإيده
وشه اتغير تمامًا
لكن المفاجأة الحقيقية كانت لما الراجل الغريب بصلي وقال جملة واحدة خلت أحمد يتراجع خطوتين
هو إنتي لسه ماعرفتيش إن جوزك مش صاحب فكرة التوكيل المزور أصلًا؟
وبعدين حط الملف الأزرق على المكتب وفتح صفحة أخيرة وقال
اللي طلب مني أعمل كده مش أحمد… ده شخص من عيلتك إنتي والاسم موجود هنا بإمضته…
فضلت باصة للراجل وأنا مش قادرة أصدق اللي سمعته وقلتله بصوت مهزوز
شخص من عيلتي؟ إنت بتقول إيه؟ مين اللي طلب منك تزور التوكيل؟
الراجل فتح الملف الأزرق وطلع ورقة وحطها قدامي وقال
اقري الاسم بنفسك يا مدام منى
مديت إيدي وخدت الورقة ولما عيني وقعت على الاسم حسيت إن قلبي اتقبض
كان اسم ابن عمي محمود
الشخص الوحيد اللي كان جدي بيثق فيه وبيعتبره زي ابنه واللي كان دايمًا بيزورني وبيسأل عليا بعد وفاة جدي
رفعت عيني وقلت
مستحيل محمود يعمل كده ده أقرب واحد ليا
أحمد حاول يتدخل وقال
منى اسمعيني بس الموضوع مش زي ما إنتي فاهمة
بصيتله وقلت
إنت آخر واحد في الدنيا ممكن أسمع منه كلمة اسمعيني دي
الراجل الغريب قعد على الكرسي وقال
محمود هو اللي وصلني بأحمد وشريف وهو اللي قدم المعلومات الخاصة بالبيت والحسابات القديمة وكمان هو اللي أكد إنك مش هتعرفي تتحركي قانونيًا بسرعة
سألته وأنا بحاول أسيطر على أعصابي
وإنت وافقت تساعدهم ليه؟
ابتسم ابتسامة باردة وقال
لأن فيه فلوس كتير اتدفعت ولأن محمود وعدني إن البيت هيتباع بعد ما نخلص إجراءات التمويل
في اللحظة دي أحمد صرخ فيه
إنت اتجننت؟ إحنا اتفقنا إنك مش هتجيب سيرة محمود!
الراجل رد عليه ببرود
أنا مش هتحمل المصيبة لوحدي عشان إنت وعيلتك تطلعوا منها زي الشعرة من العجين
حماتي عواطف بدأت تتكلم بسرعة
يا منى إنتي فاهمة غلط إحنا عيلة واحدة وكل اللي حصل ده كان عشان نساعد شريف وننقذ شركته
ضحكت من غير ما أحس وقلت
تساعدوه بإيه؟ ببيتي؟ بفلوسي؟ بتزوير إمضتي؟ ولا بخطة إنكم تلبسوني تهمة سرقة الفلوس؟
داليا بدأت تعيط وقالت
والله أنا ماكنتش أعرف إنهم هيعملوا كده أنا كنت فاكرة إن الموضوع مجرد ضمان للقرض
بصتلها وقلت
وإنتي لما عرفتي إنهم بيزوروا إمضتي عملتي إيه؟ اعترضتي؟ وقفتيهم؟ ولا قعدتي تشربي قهوة معاهم؟
ماعرفتش ترد
في اللحظة دي موبايلي اهتز وكانت رسالة من المحامية نجلاء
منى ابعتيلي التسجيل فورًا ومتلمسيش أي ورقة وخلي بالك فيه استعلام اتعمل بالفعل عن ملكية البيت باسمك
حسيت إن الوقت بيجري ضدنا
فتحت التسجيل وبعته لنجلاء وبعدها صورت الورقة اللي فيها اسم محمود
أحمد لاحظ حركة إيدي وقال بعصبية
إنتي بتعملي إيه بالموبايل؟
قلتله
ببعت آخر حاجة محتاجاها عشان تثبت إنك كنت ناوي تسرقني
اندفع ناحيتي عشان ياخد الموبايل لكني رجعت لورا وصرخت
إوعى تقرب مني
الراجل الغريب وقف بينهم وقال
خلاص كفاية كده إحنا كلنا في نفس المركب ولو التسجيل ده وصل للشرطة محدش فينا هيعرف يخرج منها
بصيتله وقلت
إنت فاكر إنك لما تهددني هخاف؟ أنا شغلي كله إني بكشف التلاعب المالي وإنت بنفسك وقعت في إيدي من تلات سنين بسبب نفس الأسلوب
وشه اتغير وقال
واضح إنك لسه فاكرة القضية القديمة لكن إنتي ماتعرفيش مين اللي كان بيحركها من ورا الستار
قبل ما أسأله سمعنا جرس الباب
أحمد اتوتر وقال
مين اللي جاي دلوقتي؟
حماتي ردت بسرعة
يمكن السواق رجع
لكن الجرس رن تاني وبعده صوت خبط قوي على الباب
سمعت صوت راجل بيقول
افتح يا أستاذ أحمد إحنا من مباحث الأموال العامة ومعانا إذن بالتفتيش
أحمد وشه اصفر وداليا بدأت تنهار في العياط وشريف حاول يخبّي الملف تحت الجاكيت
أما أنا ففضلت واقفة مكاني مش مصدقة إن المحامية قدرت تتحرك بالسرعة دي
دخلت نجلاء مع قوة من الشرطة وبعدها دخل محامي تاني كان معاها
طلبوا من الكل يقعدوا وبدأوا يفحصوا الأوراق ويسألوا عن التوكيل
أحمد فضل يكرر إن الموضوع سوء تفاهم وإن أنا اللي كنت موافقة على التمويل
لكن نجلاء حطت قدامهم تسجيل الصوت وصورة التوقيع المزور
وبعدين قالت
موكلتي لم توقع أي توكيل ولم توافق على رهن العقار ودي المستندات اللي بتثبت ملكيتها الكاملة للبيت
