تاني يوم الصبح صحيت بدري كعادتي ودخلت المطبخ أجهز الفطار وكنت مقررة إني مش هسكت المرة دي ولازم أعرف الحقيقة مهما كانت
لقيت حماتي قاعدة على السفرة بتشرب الشاي وبتتكلم في التليفون بصوت عالي وبتضحك وكأنها في بيتها بالظبط
سمعتها بتقول
أيوه يا حبيبتي ما تقلقيش أنا مرتاحة هنا جدا والشقة واسعة وكل حاجة تحت إيدي وبعدين أنا مش هرجع دلوقتي خالص
سكتت لحظة وبعدين قالت وهي بتضحك
ما هو أنا أجرت شقتي سنة كاملة وفلوس الإيجار قبضتها مقدما يعني مفيش رجوع قبل السنة ما تخلص
وقفت مكاني وأنا ماسكة طبق الفطار وحسيت إن الأرض بتتحرك من تحتي
يعني إيه أجرتي شقتك؟
حماتي اتفزعت لما شافتني واقفة وراها وقفلت المكالمة بسرعة وقالت
إنتي واقفة تسمعي كلام الناس ليه؟ دي خصوصيات
حطيت الطبق على السفرة وقلت لها بهدوء شديد
أنا بس عايزة أفهم حاجة يا طنط سعاد هو مش حضرتك شقتك فيها تصليحات؟ إزاي أجرتيها لحد لمدة سنة؟
ابتسمت ابتسامة مستفزة وقالت
آه يا حبيبتي أجرتها ودي شقتي وأنا حرة فيها وبعدين هو أنا هفضل أدفع فلوس للعمال على الفاضي؟ ما أنا كده وفرت فلوس كتير
قلت لها وأنا بحاول أتمالك أعصابي
طب وإحنا؟ حضرتك مش جاية تقعدي أسبوعين لحد ما التصليحات تخلص؟
ضحكت بصوت عالي وقالت
أسبوعين إيه بس؟ هو أنا قلتلك إني جاية أسبوعين؟ ده أنا جاية أعيش مع ابني ومراته وعايزة أشوف هتستقبلوني إزاي
في اللحظة دي دخل كريم المطبخ وكان واضح عليه إنه سمع آخر جملة
بصيتله وقلت
إنت كنت عارف إن أمك أجرت شقتها سنة كاملة؟
وشه اتغير وبص لأمه وبعدين بصلي وقال
نادية خلينا نتكلم بعدين
قلتله لأ مش بعدين أنا عايزة أفهم دلوقتي
حماتي دخلت في الكلام وقالت بكل بجاحة
وإيه المشكلة يعني؟ هو ابني مش من حقه يجيب أمه تعيش معاه؟ ولا إنتي عايزة تحرميني من ابني؟
بصيتلها وقلت
محدش حرم حضرتك من ابنك لكن أنا اتفقت مع جوزي إنك تقعدي أسبوعين مش سنة كاملة وبنتي مش هتعيش غريبة في بيتها علشان حضرتك ترتاحي
كريم قرب مني ومسك دراعي وقال بصوت واطي
نادية مش قدام ماما
شديت دراعي منه وقلت
وأنا كمان مش هتكلم في السر تاني علشان خاطر حد
حماتي قامت من مكانها وقالت وهي بتشاور بإيدها
أهو ده اللي كنت خايفة منه من الأول ست مش عارفة قيمة جوزها ولا أهله وكل اللي فارق معاها شقة ورثاها
رديت عليها وأنا ببصلها في عينيها
الشقة دي ملكي يا طنط سعاد وملك بنتي من حقها تعيش فيها مرتاحة مش من حق أي حد ياخد مكانها فيها
كريم حاول يهدّي الدنيا وقال
خلاص يا جماعة الموضوع بسيط ومش مستاهل كل ده
ضحكت من غير نفس وقلتله
بسيط؟ إنت كدبت عليا 3 شهور وخلّيتني أصدق إن في تصليحات في شقة مش موجودة أصلا وبنتك بقت بتنام في الصالة وإنت شايف إن الموضوع بسيط؟
كريم سكت ومردش
دخلت أوضتي وجبت موبايلي وفتحت الأسماء واتصلت بلورين أخته
ردت عليا بعد رنتين وقالت
صباح الخير يا نادية
قلت لها
صباح النور يا لورين أنا محتاجة أتكلم معاكي في موضوع يخص مامتك وكريم وعايزاكي تسمعيني للآخر قبل ما تحكمي
قالت باستغراب
في إيه يا نادية؟ حصل حاجة؟
بصيت لكريم وحماتي اللي كانوا واقفين قدامي وقلت
أيوه حصل كتير بس أنا عايزاكي تيجي عندي دلوقتي ومعاكي أي ورق يخص شقة مامتك لو عندك
كريم أول ما سمعني اتغيرت ملامحه وقال بسرعة
إنتي بتدخلي لورين في الموضوع ليه؟ دي ملهاش دعوة
بصيتله وقلت
لما تبقى أمك أجرت شقتها سنة كاملة وقررت تعيش عندي من غير ما حد ياخد رأيي يبقى أختك ليها دعوة
قفلت المكالمة وحطيت الموبايل على الترابيزة
حماتي كانت بتبصلي بغضب وقالت
إنتي فاكرة إنك لما تجيبي بنتي هتخوفيني؟ أنا مش بخاف من حد
رديت بهدوء
أنا مش بحاول أخوف حضرتك أنا بس بحاول أفهم إيه اللي حصل بالظبط
بعد حوالي نص ساعة لورين وصلت وكانت باين عليها العصبية والارتباك أول ما دخلت وبصت لمامتها سألتها
ماما هو إنتي مش المفروض ترجعي شقتك الأسبوع ده؟
حماتي اتلخبطت وقالت
لا يا حبيبتي لسه في شوية حاجات
لورين بصتلها وقالت
شوية حاجات إيه؟ ما إنتي قولتيلي إنك أجرتي الشقة لسنة كاملة وإنك هتقعدي عند كريم لحد ما تشوفي هتعملي إيه
كريم قام من مكانه وقال بعصبية
لورين مش وقت الكلام ده
لكن لورين تجاهلته وفتحت شنطتها وطلعت منها ورقة مطوية وقالتلي
نادية أنا مش عارفة إنتي عرفتي إيه بالظبط بس في حاجة لازم تعرفيها قبل ما تاخدي أي قرار
مدت إيدها بالورقة ناحيتي
أخدتها وبدأت أقراها ولما وصلت لآخر سطر حسيت إن قلبي وقع في رجلي
