كريم فضل ماسك الورقة وإيده بتترعش وأمي كانت واقفة جنبه وشها أصفر وأبويا بيحاول يفهم إيه اللي بيحصل
أبويا خطف الورقة من إيد كريم وقال بعصبية
إيه الكلام الفاضي ده يا منى وإنتي جايبة الورق ده منين
بصيتله وقلت بهدوء
من المكان اللي إنتوا كنتوا فاكرين إني عمري ما هوصله
أمي حاولت تضحك وقالت
إنتي أكيد مش فاهمة حاجة دي أوراق قديمة ومش عايزين نضيع وقتنا في الكلام ده
فتحت الملف وطلعت ورقة تانية وحطيتها قدامها
قلت
دي صورة تحويلات مالية من حسابي لحساب كريم على مدار أربع سنين
أبويا اتنحنح وقال
وإيه يعني ما هو أخوكي وكان محتاج مساعدتك
رديت وأنا ببص في عينه
أنا ساعدته لما خسر شغله وساعدته لما فتح المطعم ودفعت ديون عليه مرتين لكن اللي مكنتش أعرفه إن الفلوس دي كانت بتتحول لحساب تاني باسم شخص غريب
كريم اتحرك بعصبية وقال
إنتي بتتهميني بالسرقة
قلتله
أنا لسه موجهتش ليك أي اتهام
طلعت ورقة تالتة وكانت عبارة عن صورة عقد ملكية شقة في التجمع الخامس
أمي أول ما شافتها قعدت على الكرسي وقالت بصوت واطي
إنتي عرفتي موضوع الشقة كمان
بصيتلها وقلت
الشقة اللي اشتريتوها من فلوسي وسجلتوها باسم ماما عشان محدش يعرف إن كريم هو المستفيد الحقيقي
أبويا خبط بإيده على الترابيزة وقال
كفاية يا منى إحنا أهلك ومش هتتكلمي معانا بالطريقة دي
ضحكت بمرارة وقلت
أهلي؟ هو فين الأهل اللي سابوني أدفن بنتي وجوزي لوحدي؟ هو فين الأهل اللي أول ما رجعوا من المصيف افتكروا إن عندي فلوس يطلبوها؟
أمي بدأت تعيط وقالت
إحنا كنا بنحاول نساعد كريم ونعمل له مستقبل
رديت عليها
وعلى حساب مين؟ على حساب بنتك اللي فضلت طول عمرها بتشتغل وتوفر عشان بيتها؟
في اللحظة دي كريم قرب مني وقال بصوت واطي
اسمعي يا منى إحنا ممكن نحل الموضوع بينا من غير محاكم ولا فضايح
بصيتله وقلت
الموضوع مخلصش لما إنتوا طلبتوا الفلوس الموضوع بدأ من اللحظة اللي اكتشفت فيها إن أحمد كان عارف كل حاجة وسايبلي دليل
أبويا رفع راسه بسرعة وقال
أحمد كان عارف؟
هزيت راسي وفتحت جيب صغير في الملف وطلعت ظرف أبيض عليه خط إيد أحمد
أول ما أمي شافت الخط حطت إيدها على بقها
فتحت الظرف وطلعت جواب مكتوب بخط جوزي
وقريت أول سطر بصوت عالي
منى حبيبتي لو وصلتي للجواب ده فمعناه إن اللي كنت خايف منه حصل وإن أهلك حاولوا يستغلوا طيبتك مرة تانية
سكت لحظة ودموعي بدأت تنزل
وبعدين كملت
لكن في حاجة لازم تعرفيها عن أبوكي وعن الفلوس اللي اختفت من حساب الشركة
رفعت عيني وبصيت لأبويا
لقيته واقف مكانه من غير ما يتحرك
وفجأة كريم صرخ وقال
اقفلي الجواب يا منى إنتي مش عارفة إنتي بتلعبي في إيه
لكن قبل ما أكمل قراءة الرسالة رن جرس الباب
بصيت من العين السحرية ولقيت راجل لابس بدلة وماسك شنطة جلدية
فتحت الباب فقال باحترام
مدام منى أنا المستشار القانوني لأستاذ أحمد وجاي أنفذ وصيته وأسلمك آخر مستند كان محتفظ بيه
وبص ناحية الصالة ولما شاف أبويا قال جملة خلت أمي تنهار في العياط
هو حضرتك لسه ما قلتلهاش إنك كنت شريك في الشركة اللي اتسرقت منها الملايين؟
أبويا رجع خطوتين لورا ووشه اتغير تمامًا وأمي حطت إيديها على صدرها وهي بتبص للمستشار القانوني
كريم حاول يتدخل وقال بعصبية
إنت مين وداخل بيتنا تتكلم بالطريقة دي ليه
الراجل فتح شنطته وطلع كارنيه وقال
أنا المستشار شريف المحامي الخاص بالأستاذ أحمد الله يرحمه وجاي أنفذ وصيته وأسلم مدام منى المستندات اللي طلب مني أحتفظ بيها لحد الوقت المناسب
أبويا صرخ وقال
مفيش أي سرقة ولا الكلام اللي بتقول عليه ده
المستشار شريف بصله وقال
يبقى حضرتك مش هتضايق لما تعرف إن كل المستندات دي اتسلمت بالفعل للنيابة
أمي بدأت تعيط وقالت
يا منى اسمعيني إحنا عمرنا ما كنا عايزين نأذيكي
بصيتلها وقلت
إنتي سبتيني أدفن بنتي لوحدي وبعدها رجعتي تطلبي فلوس عايزاني أصدق إنك خايفة عليا؟
المستشار شريف طلب مني أقعد وفتح ملف كبير قدامي
وقال
أستاذ أحمد اكتشف من حوالي سنة إن والدك كان بيحول مبالغ مالية من حساب الشركة لحسابات خاصة بيه وبحساب كريم وكان بيستخدم توقيعات مزورة على مستندات مالية
بصيت لأبويا وأنا مش مصدقة
قلت
إزاي يا بابا تعمل كده؟
رد بعصبية
أنا كنت بحافظ على فلوس العيلة وكنت هرجع كل حاجة
المحامي رد عليه
المشكلة إن المبالغ وصلت لأكتر من 8 مليون جنيه وده غير العقود المزورة اللي اتقدمت باسم أشخاص تانية
كريم بدأ يتراجع ناحية الباب وقال
أنا ماليش دعوة بأي حاجة دي فلوس بابا وهو اللي كان بيتصرف فيها
أبويا لف ناحيته وقال بغضب
إنت كنت عارف بكل حاجة ومين اللي كان بيستلم التحويلات؟
كريم سكت ومردش
المستشار شريف طلع مستند تاني وقال
في حاجة أهم من كل ده أستاذ أحمد اكتشف إن والدك كان بيحاول يستخدم توكيل قديم باسم مدام منى عشان ينقل ملكية جزء من أملاكها من غير علمها
اتجمدت مكاني وسألته
يعني إيه أملاكي؟
رد وقال
أستاذ أحمد كان مأمن مستقبلك ومستقبل بنتك الله يرحمها وكان اشترى لكم شقة وقطعة أرض وسجلهم باسمك وباسم ليلى لكن والدك حاول يستولي عليهم باستخدام أوراق مزورة
أمي قربت مني وقالت وهي بتعيط
إحنا غلطنا يا بنتي بس والله كنا تحت ضغط وكريم كان غرقان في الديون
بصيتلها وقلت
وأنا كنت غرقانة في وجعي ومحدش فيكم حتى سألني محتاجة حد يقعد جنبي ولا لأ
في اللحظة دي المستشار شريف طلع ظرف صغير وقال
أستاذ أحمد كان موصيني أسلمك الظرف ده بنفسك بعد ما تعرفي الحقيقة كلها
فتحته ولقيت صورة ليا أنا وأحمد وليلى في يوم عيد ميلادها وتحت الصورة مكتوب
لو في يوم حسيتِ إنك بقيتي لوحدك افتكري إنك كنتِ أجمل حاجة في حياتي وإن ليلى كانت أسعد بنت في الدنيا عشان إنتي أمها
انفجرت في العياط لأول مرة من يوم الحادث
المستشار سابلي دقيقة أهدى وبعدين قال
في طلب أخير من أستاذ أحمد
بصيتله وسألته
إيه هو؟
قال
كان عايزك تعرفي إن كل الفلوس اللي ساعدتي بيها أهلك مش لازم ترجعي تطلبيها منهم عشان تثبتي حقك لكن لازم توقفي استغلالهم ليكي وتحافظي على اللي باقي من حياتك
مسحت دموعي وبصيت لأمي وأبويا وكريم
وقلت
أنا مش هطلب منكم حاجة تاني ولا عايزة منكم اعتذار دلوقتي لكن من النهارده مفيش جنيه واحد هيدخل حساباتكم من فلوسي
أبويا حاول يقرب مني وقال
إحنا برضه أهلك يا منى
رجعت خطوة لورا وقلت
الأهل مش صلة دم وبس يا بابا الأهل مواقف وإنتوا اخترتوا تكونوا أغراب في أصعب يوم في حياتي
المستشار شريف جمع أوراقه وقال إن الإجراءات القانونية بدأت بالفعل وإن محدش يقدر يتصرف في أي ممتلكات تخصني من غير موافقتي
لكن قبل ما يمشي فتح آخر ورقة في الملف وقال
في حاجة صغيرة الأستاذ أحمد طلب مني أوصلهالك بنفسك ومحدش يعرف عنها غيرك
بصيتله باستغراب
إيه هي؟
