فضلت واقفة ماسكة الورقة وببص لحسام اللي كان وشه اتقلب في لحظة وأول مرة أشوف الخوف في عينيه بالشكل ده
صرخت فيه وقلتله
إنت خايف من إيه يا حسام وإيه اللي في الورقة دي يخليك تجري عليا بالشكل ده
حاول يخطفها من إيدي لكن أبويا وقف قدامه وقاله
إيدك لو اتمدت على بنتي هتندم
حماتي نادية دخلت بسرعة وقالت بعصبية
الورقة دي ملكيش دعوة بيها يا منى دي ورقة قديمة وموضوعها انتهى
بصتلها وقلت
غريبة أوي يا طنط نادية هو مش إنتي اللي أجبرتي أبويا يمضيها وقلتي له إنها مجرد ورقة عادية
اتلخبطت وبدأت تبص لحسام كأنها بتستناه يتصرف
فتحت الورقة تاني وبدأت أقرأ الكلام المكتوب فيها بصوت عالي
كان مكتوب إن أبويا وأمي بيتنازلوا عن أي حق ليهم في الشقة اللي عايشين فيها وإنهم موافقين على إخلائها في أي وقت تطلب فيه صاحبة البيت ده
لكن اللي صعقني أكتر كان السطر اللي بعده
كان فيه إقرار إن أبويا استلم مبلغ 300 ألف جنيه مقابل التنازل وإنه ملوش أي مطالبات مالية بعد كده
بصيت لأبويا وقلتله
إنت استلمت الفلوس دي يا بابا
هز راسه بسرعة وقال
والله ما شوفت جنيه واحد يا بنتي هي قالتلي إن الورقة مجرد إثبات إننا مش هنطالب بحاجة لو مشينا من البيت وأنا مضيت عشان كنت فاكر إني بحافظ على حقك
حسام حاول يتدخل وقال
يا منى الموضوع مش زي ما إنتي فاهمة
ضحكت بمرارة وقلتله
أمال إيه يا حسام إنتوا كتبتوا على أبويا إنه استلم 300 ألف وهو مشافش جنيه واحد
نادية رفعت صوتها وقالت
إحنا أحرار في بيتنا واللي ساكن عندنا لازم يمضي على الشروط اللي إحنا بنحطها
بصيتلها وقلت
طب ليه حسام مضي على نفس الورقة
في اللحظة دي سكتت تماما
رجعت أبص على الإمضا ولقيت إن حسام كان موقع بصفته شاهد على استلام الفلوس وموافق على كل اللي مكتوب
حسام قرب مني وقال بصوت واطي
اسمعيني يا منى خلينا نتكلم لوحدنا
رديت عليه
مفيش كلام بينا غير قدام محامي
أمي كانت واقفة بتعيط ومش فاهمة إزاي الناس اللي عاشت معاهم سنين قدروا يعملوا فينا كده
مسكت إيديها وقلت
محدش هيقرب منك تاني يا ماما إحنا هنمشي دلوقتي
خرجنا من البيت وأنا حاسة إني لأول مرة باخد نفسي من سنين
أول ما وصلنا البيت الجديد أمي فضلت تبص للأوضة الصغيرة وتقول
يا بنتي هو إحنا هنضايقك هنا المكان ضيق علينا
حضنتها وقلت
ده أوسع مكان في الدنيا يا ماما طول ما إحنا عايشين فيه بكرامتنا
أبويا قعد على الكنبة وطلع نفس طويل وقال
أنا آسف يا بنتي إني خبيت عليكي الورقة دي
قعدت جنبه وقلت
إنت ملكش ذنب يا بابا الذنب على اللي استغلوا طيبتك
تاني يوم الصبح رحت لمحامية اسمها الأستاذة نهى وحكيتلها كل حاجة ووريتها الورقة
قعدت تقراها أكتر من مرة وبعدها رفعت عينها وقالت
منى الورقة دي فيها مشكلة كبيرة جدا لأن فيها إقرار باستلام مبلغ مالي من غير ما يكون فيه أي دليل على التسليم ولو والدك فعلا ما استلمش الفلوس نقدر نتحرك قانونيا ونطلب إثبات الحقيقة