رفع راسه فجأة وعينيه وسعت بذهول، كان متوقع دراما تملى العمارة وصوت عالي يخليه يضطر يزعق ويثبت رجولته المزعومة قدام أمه، لكن استسلامي المفاجئ ربكه، أما حماتي فابتسامتها رجعت بس كان فيها شك، رمت الطبق جوه الكرتونة وقالت بلؤم
أيوة كده… العقل زينة برضه، وكنت فاكراكي هتتعبينا ونقعد نجرجر في بعض، كويس إنك فهمتي مقامك ومقامنا بدري.
حمايا كان واقف في الركن، راجل كبير وساكت بيعد الكراتين بعينيه ومستني يشوف النتيجة، هز راسه بتكبر وقال
عين العقل يا بنتي، كريم ابني طول عمره كلمته هي اللي بتمشي، وإحنا برضه مش هننسالك وقفتك دي.
ابتسمتلهم بمنتهى الرقة المزيفة وقلت
طيب عن إذنكم بقى، هسيبكم تكملوا براحتكم وأنا هدخل أوضتي ألم هدومي وحاجتي الشخصية، عشان منبقاش حمل تقيل عليكم، بس يا كريم، تعالى عايزة أكلمك دقيقة واحدة في الأوضة جوة عشان نتفق هنرتب نقلنا إزاي لبيت
العيلة عشان العفش هناك.
كريم مشي ورايا وعينيه فيها نظرة ارتياح مغفلة، كان حاسس إنه انتصر في أول جولة وإنه روّض الست اللي كانت هتقلب الدنيا. أول ما دخلنا الأوضة وقفلت الباب ورايا بهدوء، قرب مني وحط إيده على كتفي بنبرة فيها حنية رخيصة وقال
أنا كنت عارف إنك أصيلة وهتفهمي… أمي كبيرة يا منى ومحتاجة تفرح بشقة واسعة ومريحة، وإحنا لسه صغيرين ونقدر نبدأ من جديد في أي مكان.
شلت إيده من على كتفي ببطء، وبصيتله في عينيه وقلتله بنبرة هادية جداً
طبعاً يا حبيبي، بس الشقة هناك عند مامتك صغيرة، وإنت عارف إن عيال أخوك بيكسروا كل حاجة، تفتكر العفش بتاعي اللي جبته بتعبي هيساع هناك؟ ولا الأفضل نبيعه وناخد تمنه نحطه في البنك؟.
كريم لمعت عينيه، وطمع الدنيا كله بان في وشه
تصدقي فكرة حلوة أوي! وإحنا محتاجين سيولة برضه عشان الأيام الجاية.
قلتله
خلاص، سيبلي الموضوع ده، أنا
هتصل بمعارفي من بتوع الموبيليا والمستعمل يجوا ياخدوا الحاجة اللي مش هنحتاجها، وأنت ركز مع مامتك في نقل كراتينها.
خرج كريم وهو طاير من الفرحة، مفكر إن الدنيا ماشية زي ما خطط، بس الغبي نسي نقطة واحدة… نقطة تخليه هو وأمه يلفوا حوالين نفسهم كعب داير ويدوقوا طعم القهرة الحقيقية.
أول ما قفلت الباب على نفسي، ممدتش إيدي على فستان ولا طرحة، فتحت الخزنة الصغيرة اللي في قعر الدولاب بالمفتاح اللي دايمًا متشال في ميداليتي. طلعت الملف الكحلي القديم، ملف العقود.
فتحت العقد، وقريت البنود بعينيا وأنا بحس بدمي بيغلي بس بتركيز فولاذي. كريم طول عمره عايش في وهم إنه سيد قراره، ونسي في غمرة فرحته بالشقة التمليك من ست سنين، لما كان مرتبه ميسمحش ياخد قرض التمويل العقاري، وبابايا الله يرحمه دفع نص تمن الشقة كاش من مكافأة نهاية خدمته، وباقي الأقساط كانت بتتخصم من حسابي
البنكي لأن مرتبي
